Ukraina qurolli kuchlari 22 avgustga o‘tar kechasi Kursk atom elektr stansiyasiga uchuvchisiz uchoq bilan hujum qilishga urindi. Bu haqda 23 avgust, juma kuni TASS Rossiya davlat agentligi huquq-tartibot idoralaridagi manbalariga tayanib ma’lum qildi. «2024 yil 22 avgustga o‘tar kechasi Kiyev rejimi AESda kamikadze dron yordamida yadroviy terrorchilik aktini amalga oshirishga urindi», — deya ismini oshkor etmagan suhbatdoshining so‘zlarini keltiradi agentlik.
«Dron Army of Drones deb belgilangan - bu Ukraina qurolli kuchlari Bosh shtabi, Mudofaa vazirligi va Ukrainaning boshqa idoralarining qo‘shma loyihasi bo‘lib, UUA ishlab chiqish va ularni Ukraina qurolli kuchlariga taqdim etish uchun yaratilgan», - deya aniqlik kiritdi TASS.
Putin Ukrainani Kursk AESga hujum qilishga urinishda aybladi
Rossiya prezidenti Vladimir Putin ham avvalroq Ukrainani Kursk atom elektr stansiyasiga hujum qilishga uringanlikda aybladi. «Dushman bugun tunda AESga zarba bermoqchi bo‘ldi», — deya uning Ukraina qurolli kuchlarining 22 avgust kuni Kursk viloyatidagi hujum operatsiyasiga bag‘ishlangan yig‘ilishdagi so‘zlaridan iqtibos keltirgan TASS davlat agentligi.
Putin o‘z ayblovlari bo‘yicha hech qanday dalil keltirmadi. Uning so‘zlariga ko‘ra, Moskva Atom energiyasi bo‘yicha xalqaro agentlikni (AEXA) xabardor qilgan, uning mutaxassislari vaziyatni baholash uchun voqea joyiga kelishi kerak.
Kursk viloyati gubernatori vazifasini bajaruvchi Aleksey Smirnov Ukraina qurolli kuchlarining Kursk viloyatida davom etayotgan harbiy amaliyoti fonida mintaqa bir qancha shaharlarida temir-beton boshpanalar o‘rnatish boshlanganini ma’lum qilgandi - gap atom elektr stansiyasi joylashgan Kursk, Jyeleznogorsk va Kurchatov haqida ketyapti.
AEXA bosh direktori Kursk AESga boradi
Kuni kecha AEXA bosh direktori Rafael Grossi kelasi hafta Moskva taklifiga binoan Kursk atom elektr stansiyasiga tashrif buyurish niyatida ekanini aytdi. Uning so‘zlariga ko‘ra, stansiya hozirda «texnik jihatdan Ukraina qurolli kuchlarining artilleriyasi masofasida».
Kursk AES - Rossiyadagi eng yirik elektr stansiyalaridan biri. U to‘rtta energiya blokidan iborat bo‘lib, ulardan ikkitasi Ukraina qurolli kuchlarining mintaqadagi faol harakatlari fonida ishlashda davom etmoqda. "Rosatom" 8 avgust kuni AES hududidan urib tushirilgan raketalarning bo‘laklari topilganini ma’lum qildi. Ukraina tashqi ishlar vazirligi Ukraina qurolli kuchlari Kursk atom elektr stansiyasiga hujum qilishni rejalashtirmayotgani va hujum qilishni xohlamasligini bildirdi.
