Fevral oyida Rossiyadagi koloniyada vafot etgan rossiyalik muxolifatchi Aleksey Navalniyning bevasi Yuliya Navalnaya Berlinda Germaniya kansleri Olaf Shols va Germaniya tashqi ishlar vaziri Annalena Berbok bilan uchrashdi. Bu haqda 23 avgust, juma kuni turmush o‘rtog‘i vafotidan so‘ng uning ishini davom ettirishga qaror qilgan Navalnayaning o‘zi ma’lum qildi.
Yuliya Navalnaya ta’kidlaganidek, u Shols va Berbokka rossiyalik siyosiy mahbuslarni ozod qilishda ishtirok etgani uchun shaxsan minnatdorchilik bildirishi muhim edi. «Ammo biz uchrashuvlarni garovda qolayotganlarga amaliy yordam ko‘rsatishni muhokama qilishga bag‘ishladik», - deya qo‘shimcha qildi u.
Rossiya, Belarus va G‘arb o‘rtasida keng ko‘lamli mahbuslar almashinuvi
1 avgust kuni sovuq urush davridan beri Rossiya, Belarus va G‘arb davlatlari o‘rtasida eng yirik mahbuslar almashinuvi bo‘lib o‘tdi.
Rossiya almashinuv paytida G‘arb davlatlariga: siyosatchilar Vladimir Kara-Murza va Ilya Yashin, huquq himoyachisi Oleg Orlov, jamoat arbobi Andrey Pivovarov, rassom Sasha Skochilenko, muxolifatchi Aleksey Navalniyning sheriklari Liliya Chanisheva, Kseniya Fadeyeva va Vadim Ostanin, Germaniya fuqarosi Kevin Lik; jurnalist Ivan Safronov ishi qatnashchisi, Rossiya va Germaniya fuqaroligiga ega siyosatshunos Diter Voronin, Germaniya va Rossiya fuqarosi Germana Moyjyes, AQSh fuqarolari Pol Uilan, Evan Gershkovich, Alsu Kurmasheva, Germaniya fuqarosi Patrik Shobelni topshirdi. Belarus hukumati ham o‘lim jazosiga hukm qilingan Germaniya fuqarosi Riko Krigerni ekstraditsiya qildi.
Rossiyaga «Tirgarten qotili» Vadim Krasikovdan tashqari, AQShda kompyuterni buzish va firibgarlikda ayblanib 9 yilga qamalgan Vladislav Klyushin; Sloveniyada josuslikda ayblanib 1 yil 7 oyga qamalgan Artem va Anna Dulsevlar; Polshada Rossiya foydasiga josuslikda ayblangan Pavel Rubsov; Norvegiyada Rossiya foydasiga josuslikda ayblangan Mixail Mikushin; Qo‘shma Shtatlarda kiberfiribgarlikda ayblanib 27 yil qamoq jazosiga hukm qilingan Roman Seleznev; AQShda Rossiya harbiy-sanoat kompleksi uchun texnologiya va Amerika o‘q-dorilarini kontrabanda qilishda ayblangan Vadim Konoshchenok qaytdi.
