«Tolibon» Afg‘onistondagi ayollarga erkaklarga qarash va jamoat joylarida baland ovozda gaplashishni taqiqlamoqda. Yangi tartib-qoidalar qayd etilgan 114 varaqli hujjat bilan tanishib chiqqan The Telegraph’ning yozishicha, afg‘on fuqarolarining kundalik hayotini tartibga solish bo‘yicha qat’iy choralar belgilangan.

«Balog‘at yoshidagi ayollarning begona erkaklarga qarashi taqiqlanadi», — deyiladi qoidalarning birida. Shuningdek, ayollarga «o‘zgalar nafsini qo‘zg‘atmaslik va ularni o‘ziga jalb etmaslik» uchun yuzlarini yopib yurish va begona erkaklar bor joyda suhbatdan tiyilish buyurilgan.

Bundan tashqari, afg‘on ayollariga ovozlari ko‘chaga eshitilmasligi uchun o‘z uylarida ham baland ovozda gaplashish taqiqlangan.

«Xalqaro hamjamiyatning «Tolibon» bilan o‘zaro munosabatlari ularni ayollarga bosimni davom ettirishga undadi. Hokimiyat tepasidagilar bizning mavjudligimizni tan olishdan bosh tortayotgan radikal shaxslardir», — deydi Kobulda davlat idorasida ishlagan Zaynab ismli sobiq xodim.

Asosan ayollar yurish-turishiga taalluqli bo‘lgan yangi qoidalar ularga jamoat joylarida doimo tanalarini yopgan holda yurish majburiyatini yuklamoqda.

Bundan tashqari, ayollarga jamoat joyida qo‘shiq aytishi yoki Qur’on o‘qishi ham taqiqlangan, ularning ust-boshi esa yupqa, tor yoki kalta bo‘lmasligi kerak.

Taksi haydovchilariga «hijobsiz yoki erkak mahrami bo‘lmagan ayollarni» olib yurish, transport vositasida musiqa tinglash ham taqiqlandi. «Tolibon»ga ko‘ra, yangi qoidalarga bo‘ysunmaganlar hibsga olinib, qamoqqa yuboriladi.

Shuningdek, erkaklarning ham jamoat joylaridagi ayollar yuziga qarash, tor kiyim kiyishi ham taqiqlandi. Shu bilan birga, endi ular soqolini kaltalatishi ham mumkin emas.

Nashrning yozishicha, yangi qoidalar shundoq ham gumanitar tashkilotlarda ishlash, bog‘larga borish, erkak hamrohsiz harakatlanish taqiqlangan afg‘on ayollarining g‘azabi sabab bo‘lmoqda.