Bloomberg agentligining 22 avgust, payshanba kuni xabar berishicha, Rossiya Mudofaa vazirligi Donbassdagi front chizig‘idan Ukraina qurolli kuchlarining (UQK) hujumi uchinchi haftadan beri davom etayotgan Kursk viloyatiga qo‘shinlarni o‘tkazmaslikka qaror qildi.
Ukraina qurolli kuchlarining Rossiya hududiga chuqurroq kirib borishini to‘xtatishga bo‘lgan muvaffaqiyatsiz urinishlariga qaramay, Rossiya armiyasi Donetsk viloyatidagi hujumlarini susaytirmayapti. O‘tgan haftada Rossiya qurolli kuchlari Donbassdagi Ukrainaning muhim logistika markazi bo‘lgan Pokrovsk shahri hududida oldinga siljishdi.
Biroq, Amerika urushni o‘rganish instituti (ISW) ma’lumotlariga ko‘ra, bir qator rus qo‘shinlari Ukrainaning janubi va sharqidan Kursk viloyatiga ko‘chirilgan, ammo ularning bo‘linmalari oldingi chiziqda emas edi. Harbiy tahlilchi Yan Matveyevning fikricha, Kursk viloyatidagi Ukraina kuchlari nazoratidagi aholi punktlarini qaytarish uchun 40 mingdan 50 minggacha rus askari kerak bo‘ladi. Bloomberg manbasiga ko‘ra, Kreml bu operatsiyada muddatli harbiy xizmatchilardan foydalanish niyatida.
Ukrainaning Kursk viloyatidagi hujumi
Ukraina qurolli kuchlari 6 avgustdan buyon Kursk viloyatida keng ko‘lamli hujum operatsiyasini o‘tkazmoqda. Ukraina qurolli kuchlari bosh qo‘mondoni Aleksandr Sirskiy 20 avgust kuni Ukraina harbiylari mintaqadagi 1260 kvadrat kilometrdan ortiq hudud va 93 ta aholi punktini nazoratga olganini ma’lum qildi. Sirskiyning so‘zlariga ko‘ra, ukrain tuzilmalari Rossiya hududiga 28-35 kilometr chuqurlikda kirib borgan.
9 avgustdan Belgorod, Bryansk va Kursk viloyatlarida aksilterror operatsiyasi rejimi joriy etilgan. Kursk viloyati gubernatori vazifasini bajaruvchi Aleksey Smirnov Rossiya prezidenti Vladimir Putin ishtirokidagi chegara hududidagi vaziyatga bag‘ishlangan yig‘ilishda 133 ming kishi hududni tark etganini, 20 mingga yaqini hamon chegara zonasida ekanini ma’lum qildi.
Smirnov o‘zining Telegram-kanalida Kursk viloyatining chegaradosh tumanlaridagi maktablar masofaviy ta’lim formatiga o‘tkazilganiga ham ishora qildi. Uning so‘zlariga ko‘ra, deyarli 3,5 ming Kursk maktab o‘quvchilari bugungi kunda Rossiya Federatsiyasining boshqa mintaqalarida vaqtincha yashash joyidagi maktablarga yozilishi kerak.
