Rossiya 1 avgust kuni Yevropa kengashining milliy ozchiliklarni himoya qilish bo‘yicha doiraviy konvensiyasidagi ishtirokini rasman to‘xtatdi. Bu haqda 14 avgust, chorshanba kuni rasmiy huquqiy hujjatlar portalida joylashtirilgan Rossiya TIV hujjatida aytiladi.
Rossiya prezidenti Vladimir Putin 2023 yil sentabr oxirida Davlat dumasiga Yevropa Ittifoqi konvensiyasini denonsatsiya qilish to‘g‘risidagi qonun loyihasini kiritdi. Oktyabr oyida hujjat Rossiya parlamenti tomonidan qabul qilingan va davlat rahbari tomonidan imzolangan.
Qonun loyihasiga tushuntirish xatida Yevropa kengashi Vazirlar qo‘mitasi 2022 yil sentabrida rossiyalik ekspertning konvensiya bo‘yicha ishtirokchi davlatlar majburiyatlari bajarilishini nazorat qilish uchun tuzilgan qo‘mitadagi vakolatlarini sezilarli darajada cheklagani ko‘rsatilgan. Rossiya Federatsiyasi, shuningdek, qarorlar ishlab chiqishda ishtirok etish va milliy ozchiliklar, birinchi navbatda, chet eldagi rusiyzabon aholi huquqlarining buzilishi holatlarini kuzatish imkoniyatidan mahrum bo‘ldi. Bundan tashqari, hujjatda qayd etilishicha, konvensiyadan chiqish Rossiya Federatsiyasiga Yevropa kengashi monitoringi doirasida «kamsituvchi munosabatlardan qochish» imkonini beradi.
Rossiya 1996 yilda milliy ozchiliklarni himoya qilish to‘g‘risidagi konvensiyani imzolagan
Rossiya 1996 yil fevral oyida milliy ozchiliklarni himoya qilish bo‘yicha doiraviy konvensiyani imzoladi. Hujjat, xususan, milliy ozchiliklarning irodasiga qarshi assimilyatsiya qilinishini, kamsitilishini taqiqlaydi, shuningdek, milliy ozchiliklar o‘z tilidan erkin foydalanish huquqini ta’minlaydi.
2022 yil fevral oyida Rossiya Federatsiyasining Ukrainaga keng ko‘lamli harbiy hujumi boshlanganidan so‘ng, Yevropa kengashi Vazirlar qo‘mitasi Rossiyaning kengash nizom organlaridagi vakolatini to‘xtatdi. O‘sha yilning mart oyida qo‘mita Rossiyani tashkilotdan chiqarish to‘g‘risidagi rezolyutsiyani ma’qulladi va Rossiya Federatsiyasi Yevropa kengashi Bosh kotibini tashkilotdan chiqish niyati haqida rasman xabardor qildi. 2023 yil fevral oyida Rossiya Federatsiyasi Davlat dumasi ushbu tashkilot bilan Rossiyaga nisbatan 21 ta xalqaro shartnomani, shu jumladan inson huquqlari bo‘yicha konvensiyani bekor qilish to‘g‘risida qonun qabul qildi.
