Yevropa Ittifoqi Rossiya «nazorati ostidagi bo‘lginchi Abxaziya va Janubiy Osetiya hududlarida harbiy ishtirokini davom ettirayotganini» qoraladi. Tegishli baho Yevropa komissiyasi rasmiy vakili Piter Stanoning 6 avgust, seshanba kuni e’lon qilgan bayonotida keltirilgan. Sharh Gurjistonda 2008 yil 7 avgustda boshlangan urushning o‘n olti yilligiga to‘g‘ri keladi.
Bryusselning ta’kidlashicha, Gurjistonning mojarolardan jabr ko‘rgan jamoatlarida inson huquqlari, jumladan, «chegaralash» siyosati - nazorat-o‘tkazish punktlarini yopish va Rossiya harbiylari va noqonuniy ayirmachilarning noqonuniy qo‘lga olishlari natijasida poymol qilinishda davom etmoqda. Hujjatda: «Harakat erkinligiga cheklov, inson huquqlarining buzilishi tekshirilishi va barcha jabrlanganlar uchun adolat ta’minlanishi kerak», deyiladi.
YeI mojaroni tinch yo‘l bilan hal qilishga to‘liq sodiq qoladi, shu jumladan, Yevropa Ittifoqining Jyeneva xalqaro munozaralari (GID) hamraisi sifatida ishtirok etishi, Yevropa Ittifoqining Janubiy Kavkaz bo‘yicha maxsus vakili faoliyati va Yevropa Ittifoqining kuzatuvchilar missiyasi davom etadi. «Biz barcha ishtirokchilarni 2008 yil 12 avgustdagi olti bandlik kelishuvni to‘liq amalga oshirishga erishish uchun munozaralarda konstruktiv ishtirok etishga chaqiramiz», deb qo‘shimcha qildi Bryussel.
«Besh kunlik urush»
«Besh kunlik urush» Rossiya Federatsiyasining o‘z hududidan tashqaridagi birinchi harbiy operatsiyasi hisoblanadi. U 2008 yil 7 avgustdan 8 avgustga o‘tar kechasi Tsxinvalida boshlangan.
Mintaqaga katta rus qo‘shinlari kiritildi. Janglar 12 avgust kuni Gurjiston armiyasining mag‘lubiyati bilan yakunlandi. Rossiya harbiylari Janubiy Osetiya qurolli kuchlari bilan birgalikda gurji qo‘shinlarini o‘z nazorati ostida bo‘lmagan hududdan siqib chiqardi va Tbilisi yaqinida to‘xtadi.
Rossiya harbiylari 2008 yil avgustdagi urushda 67 kishini yo‘qotgan bo‘lsa, Gurjiston tomonida 170 kishi halok bo‘lgan. Besh kun davom etgan mojaroda jami 850 ga yaqin odam qurbon bo‘ldi, ikki mingga yaqin kishi jarohat oldi. 30 mingga yaqin gurjilar Janubiy Osetiyadan chiqarib yuborilgan, ularning aksariyati hanuzgacha o‘z uylariga qayta olmayapti.
