Ukrainalik sportchi Yaroslava Maguchix 4 avgust, yakshanba kuni Parijda bo‘lib o‘tgan balandlikka sakrash bo‘yicha ayollar musobaqasining finalida raqiblarini mag‘lub etib, 2024 yilgi Olimpiya o‘yinlarining oltin medali sohibiga aylandi.

Ayollar o‘rtasida balandlikka sakrash bahslarida kumush avstraliyalik sportchi Nikola Olislagersga nasib etdi. Maguchix ham, Olislagers ham 2 metr balandlikka erishdi, ammo ukrainalik birinchi urinishda, avstraliyalik esa faqat uchinchi urinishda muvaffaqiyat qozondi.

22 yoshli Maguchix ushbu sport turi bo‘yicha rekordchi hisoblanadi. 2024 yil iyul oyida Parijdagi Olmos o‘yinlarida u balandlikka sakrash bo‘yicha yangi jahon rekordini o‘rnatdi - 2,10 metr. Ayollar o‘rtasida balandlikka sakrash bo‘yicha avvalgi rekord 1987 yilda bolgariyalik Stefka Kostadinova tomonidan o‘rnatilgan - 2,09 metr.

Ukraina ayollar o‘rtasida sakrashda oltin va bronzani qo‘lga kiritdi 

Maguchix balandlikka sakrash musobaqasining finalidan so‘ng shohsupaga ko‘tarilgan yagona ukrainalik sportchi emas. Undan biroz avval yengil atletikachi Irina Gerashchenko finaldagi natijasiga ko‘ra Ukrainaga bronza medalini taqdim etgandi. 

29 yoshli sportchi 1,95 metr balandlikka sakrashga muvaffaq bo‘ldi. Gerashchenko bronza medalini bir xil balandlikka sakragan avstraliyalik Eleanor Patterson bilan bo‘lishdi.

Mixail Koxan Ukrainaga bronza medalini olib keldi

Shu oqshom Ukraina yana bir Olimpiya medalini qo‘lga kiritdi. Bolg‘a uloqtirish bahslarida bronza medali 23 yoshli sportchi Mixail Koxanga nasib etdi, u snaryadni 79,39 metr masofaga uloqtirdi.

Musobaqa finalida ukrainalik kanadalik Itan Katsbergga (84,12 metr) va vengriyalik Xalas Bensega (79,97 metr) yutqazdi. 

Har uchala sportchini medallari bilan Ukraina prezidenti Volodimir Zelenskiy ijtimoiy tarmoqlar orqali tabrikladi.

Umuman olganda, Ukraina 4 avgust oqshomidagi holatiga ko‘ra, 2024 yilgi Olimpiya o‘yinlarida oltita medalga ega.