Ukraina qurolli kuchlari Sevastopol hududidagi Kilen-buxtada joylashgan Rossiyaning B-237 «Rostov-na-Donu» suvosti kemasini yo‘q qildi. Ukraina Qurolli kuchlari Bosh shtabi 3 avgust kuni ijtimoiy tarmoqlarda suvosti kemasiga muvaffaqiyatli zarba berilganini tasdiqlovchi xabarni joylashtirdi.
Idora bayonotiga ko‘ra, Ukraina raketa kuchlari 2 avgustga o‘tar kechasi Qrimdagi Rossiya Federatsiyasining harbiy obektlariga zarbalar berdi. «Sevastopol portida Rossiya Qora dengiz flotining «Rostov-na-Donu» suvosti kemasi muvaffaqiyatli urildi, zarba natijasida u voqea joyida cho‘kib ketdi», - deya xabar berdi Ukraina Qurolli kuchlari Bosh shtabi.
Bosh shtab ma’lumotlariga ko‘ra, o‘sha tunda Ukraina raketa qo‘shinlari Qrimda joylashgan S-400 «Triumf» zenit-raketa kompleksining 4 ta uchiruvchi qurilmasiga «jiddiy zarar yetkazgan».
Rossiya Mudofaa vazirligi «Rostov-na-Donu»ga hujum haqida xabar bermadi
Sevastopolga raketa hujumlari uyushtirilgani haqidagi xabarlar 2 avgustga o‘tar kechasi Qrimning bir qator Telegram-kanallarida paydo bo‘ldi. Mahalliy aholining so‘zlariga ko‘ra, hujumdan keyin Kilen-buxtada Rossiya kema ta’mirlash zavodi hududida tutun paydo bo‘lgan. Keyinchalik ommaviy axborot vositalarida suvosti kemasini ta’mirlash bilan bog‘liq shikastlangan tuzilmalar ko‘rsatilgan sun’iy yo‘ldosh tasvirlari e’lon qilindi.
2 avgust kungi hujumni Sevastopol «gubernatori» Mixail Razvojayev tasdiqladi. Shahardagi obektlar, jumladan, AQSh tomonidan Ukrainaga yetkazib berilgan ATACMS raketalari bilan o‘qqa tutilgan, dedi rasmiy. Biroq, Razvojayev qandaydir obektga zarar yetkazilgani haqida xabar qilmadi va hujumni «qaytarilgan» deb atadi.
O‘z navbatida, Ukraina Qurolli kuchlarining hujumlari doimiy tarzda «qaytarilgani» haqida xabar beradigan Rossiya Mudofaa vazirligi 2 avgust kuni Qrimdagi nishonlarga zarbalar haqida hech qanday ma’lumot taqdim etmadi. Idora faqat kechga borib Kursk oblasti va Krasnodar o‘lkasi ustidan urib tushirilgan uchuvchisiz uchoqlar haqida ma’lum qildi.
«Rostov-na-Donu» suvosti kemasi «Kalibr» raketalarini uchirishi mumkin va 300 mln dollarga baholanadi
Taxminlarga ko‘ra, cho‘kib ketgan suvosti kemasi NATO tasnifiga ko‘ra «Kilo» sinfidagi kemalarga tegishli. Ukraina Qurolli kuchlari Bosh shtabi ma’lumotlariga ko‘ra, bu Rossiya Qurolli kuchlarining to‘rtta suvosti kemalaridan biri bo‘lib, ular urush paytida Ukrainani ommaviy o‘qqa tutish uchun ham qo‘llangan «Kalibr» raketalaridan foydalanishi mumkin. Bungacha Rossiya Federatsiyasi Suriyada «Rostov-na-Donu»dan foydalangan.
Ushbu turdagi suvosti kemasining narxi 300 million dollarga baholanmoqda.
Yo‘q qilish vaqtida suvosti kemasi 2023 yil 13 sentabrda Ukraina Qurolli kuchlari tomonidan uyushtirilgan hujum paytida shikastlanganidan keyin ta’mirlanayotgan edi.
Ukraina Qurolli kuchlari Bosh shtabi o‘z xabarida ta’kidlanishicha, suvosti kemasi yo‘q qilinishi «Rossiya floti uchun Qora dengizning Ukraina hududiy suvlarida xavfsiz joy yo‘qligini yana bir bor isbotlaydi». Avvalroq Ukraina tomoni Rossiya Federatsiyasi Qora dengiz floti kemalarining muhim qismini Ukrainadan uzoqroqdagi pozitsiyalarga olib chiqib ketganini da’vo qilgan edi.
