Rossiyada uch nafar xorijlik «yollanma faoliyat» va Ukraina tomonida Rossiya Federatsiyasiga qarshi harbiy harakatlarda qatnashishda ayblanib, sirtdan hukm qilindi. 30 iyul, seshanba kuni Rossiya Federatsiyasi Tergov qo‘mitasi (TQ) Telegram’da AQSh, Gurjiston va Latviya fuqarolariga nisbatan chiqarilgan hukmlarni e’lon qildi.
AQSh fuqarosi sirtdan 14 yilga qamaldi
Ushbu ma’lumotlarga ko‘ra, AQSh fuqarosi Sent-Jon Maykl-Artur Ukraina Qurolli kuchlari tomonida urushda qatnashgani uchun 14 yilga ozodlikdan mahrum etilgan va xalqaro qidiruvga berilgan.
1991 yilda tug‘ilgan dengiz piyoda askarlari faxriysi Ukrainaga 2022 yil fevral oyida kelgan va Xalqaro legion tarkibida «oyiga kamida 1000 AQSh dollari miqdorida moddiy to‘lov» evaziga Rossiya va «DXR»ga qarshi jangovar harakatlarda qatnashgan. Rossiya rasmiylariga ko‘ra, Maykl-Artur 2024 yilning mayigacha Ukraina Qurolli kuchlari safida jang qilgan.
Gurjiston va Latviya fuqarolari uzoq muddatli jazoga hukm qilindi
Bundan tashqari, Rossiya sudi Gurjiston fuqarosi Shota Demetrashvili va Latviya fuqarosi Aninsh Atvarsga nisbatan hukm chiqardi, ular ham qurolli mojaroda «yollanma askar sifatida» qatnashganlikda aybdor deb topildi. Bayonotda ta’kidlanganidek, ular 2022 yilda «moddiy mukofot olish uchun» Ukrainaga kelgan va Rossiya Qurolli kuchlariga, shuningdek, «DXR» va «LXR» deb nomlangan hududlar kuchlariga qarshi Gurjiston milliy legioni va Ukraina hududiy mudofaa xalqaro legioni tarkibida jangovar harakatlarda qatnashgan.
Shu bilan birga, Demetrashvili sirtdan 14 yilga, Atvars 13 yilga ozodlikdan mahrum etildi. «Ushbu shaxslar xalqaro qidiruvga berilgan», — deyiladi departament xabarida.
Avvalroq Norvegiya, Finlandiya, Latviya, Polsha, Ruminiya, Niderlandiya, Gurjiston va Yangi Zelandiya fuqarolari bunday ayblovlar bilan sirtdan hibsga olingani haqida xabar berilgan edi. Umuman olganda, Rossiya Federatsiyasi Ukraina tomonida harbiy harakatlarda qatnashganlikda ayblangan 700 ga yaqin xorijlikni qidirmoqda. O‘z navbatida, Ukraina Rossiyaning Ukraina davlatiga qarshi hujumida ishtirok etgan xorijiy yollanma askarlarni ham sud qilyapti.
