Parij-2024 Olimpiadasida keyingi bosqichga yo‘llanma olgan boks bo‘yicha O‘zbekiston milliy jamoasi a’zolari soni 6 nafarga yetdi.

30 iyul, seshanba oqshomida Hasanboy Do‘smatov Parij-2024 Olimpiadasi boks bahslarini g‘alaba bilan boshladi.

Rio-2016 Olimpiadasi g‘olibi sanalmish o‘zbekistonlik -51 kg vazn toifasidagi bokschi o‘zining musobaqadagi ilk bahsini Puerto-Riko vakili Xuan Manuyel Lopesga qarshi o‘tkazdi. Jangda raqibidan ustunligini namoyish etgan Hasanboy uch raund yakuniga ko‘ra, 5:0 hisobida g‘alabaga erishib, chorakfinalga yo‘llanma oldi.

Hasanboyning jangidan yarim soat o‘tib, boks bo‘yicha O‘zbekiston milliy jamoasining eng yosh a’zosi To‘rabek Habibullayev ham Parij-2024 Olimpiadasi boks bahslarini g‘alaba bilan boshladi.

-80 kg toifasidagi o‘zbekistonlik 20 yoshli bokschi 1/8 finalda filippinlik Tokio-2020 sovrindori Eumir Marsyalga qarshi ringga ko‘tarildi. Jang davomida raqibidan ustunligini ko‘rsata olgan To‘rabek uch raund yakunlariga ko‘ra, Marsyalni mag‘lubiyatga uchratdi – 5:0.

Shu tariqa, u hozirgacha chorakfinalga yo‘llanma olgan o‘zbekistonlik 6-bokschiga aylandi. 

Eslatib o‘tamiz, bungacha bokschilardan Ruslan Abdullayev, Lazizbek Mullajonov, Bahodir Jalolov, Hasanboy Do‘smatov va Sitora Turdibekova ham keyingi bosqichga chiqqan bo‘lsa, Nigina O‘ktamova turnirni tark etgandi.