AQSh Moliya vazirligi 30 iyul, seshanba kuni Eron, Xitoy va Hongkongda joylashgan besh nafar shaxs va yetti kompaniyaga Eronning ballistik raketa va uchuvchisiz uchoqlar dasturida ishtirok etgani uchun sanksiyalar kiritdi. Moliya vazirligiga ko‘ra, bu kompaniyalar Eron Mudofaa vazirligi uchun turli butlovchi qismlarni sotib oladi yoki ishlab chiqaradi.

Xarid qilingan komponentlardan foydalangan holda Eronda ishlab chiqarilgan raketalar va UUA keyinchalik Yaqin Sharq va Rossiyaga yuboriladi, deyiladi xabarda. «Eronning ballistik raketalar va uchuvchisiz uchoqlarni ehtiyotsiz ravishda tarqatishi yanada beqarorlikni keltirib chiqaradi, mintaqada va butun dunyoda tinch aholi hayotiga tahdid soladi», dedi AQSh moliya vaziri o‘rinbosari Brayan Nelson.

Sanksiyalar, xususan, Xitoyda joylashgan Beijing SNTD kompaniyasiga qarshi joriy qilingan. U, AQSh Moliya vazirligi ma’lumotlariga ko‘ra, Eron Mudofaa vazirligining soxta kompaniyasi hisoblanadi. Aytilishicha, kompaniya Eron uchun giroskop va akselerometrlar - ballistik raketalar va uchuvchisiz uchuvchi apparatlarni yaratish uchun asosiy komponentlarni sotib olgan. AQSh jazosiga tortiladigan shaxslar orasida Beijing SNTD xodimi va uning Erondagi hamkori ham bor. 

Cheklovlar Eron kerakli komponentlarni sotib olgan «qo‘shimcha soxta kompaniyalar va agentlarni fosh qiladi», dedi Nelson. Uning qo‘shimcha qilishicha, Qo‘shma Shtatlar «Eronga ushbu halokatli qurollarni ishlab chiqarishda yordam berganlarni jazolashda davom etadi».