Rossiya Federatsiyasining Volgograd viloyatida yo‘lovchi poyezdi vagonlari relsdan chiqib ketishi oqibatida 100 dan ortiq kishi jabrlandi. Bu haqda 29 iyul, dushanba kuni Rossiya Favqulodda vaziyatlar vazirligining Telegram-kanalida xabar berildi. 

«To‘qqizta vagon relsdan chiqib ketdi, ulardan 7 tasi ag‘darildi. Dastlabki ma’lumotlarga ko‘ra, 100 dan ortiq odam jarohatlangan», — deyiladi xabarda. 

Departamentning qayd etishicha, poyezd relsdan chiqib ketgan joyda favqulodda qutqaruv ishlari olib borilmoqda. «Yong‘in va qutqaruv bo‘linmalari jabrlanganlarni qutqardi va birinchi tibbiy yordam ko‘rsatdi. Poyezd yo‘lovchilarini vaqtinchalik joylashtirish punktlariga yetkazib berish tashkil etildi – Kotelnikovo shahrida 8 ta shunday joy tayyor», — deyiladi ma’lumotda. 

Maksim Gorkiy stansiyasidan avariya joyiga qutqaruv va yong‘in o‘chirish poyezdlari yo‘lga chiqdi, deya qo‘shimcha qildi Rossiya Favqulodda vaziyatlar vazirligi. 

Avvalroq voqea joyida 324 nafar mutaxassis va 109 dona texnika ishlayotgani, ikkita vertolyot uchishga tayyorligi xabar qilingan edi. 

Bundan oldin «Rossiyskiye jyeleznyye dorogi» («RJD») Rossiya Federatsiyasining Volgograd viloyatida sakkizta poyezd vagonining relsdan chiqib ketgani haqidagi xabarlarni tasdiqladi. 

«Soat 12:35 da Volgograd viloyatidagi Gremyachaya - Kotelnikovo ko‘chasida KAMAZ yuk mashinasi haydovchisi temiryo‘l kesishmasiga chiqib ketib, 491-sonli Qozon - Adler yo‘lovchi poyezdi bilan to‘qnashib ketdi», deyiladi matnda.

Volgograd viloyati ma’muriyatining rasmiy Telegram-kanali poyezdda 812 kishi bo‘lganini ta’kidladi.