26 iyul, juma kuni Parijda XXXIII yozgi Olimpiya o‘yinlarining tantanali ochilish marosimi bo‘lib o‘tdi. Tarixda birinchi marta u stadionda emas, balki suvda - Sena daryosida o‘tkazildi. An’anaviy milliy qayiq paradida 206 davlatdan 10 mingdan ortiq sportchi ishtirok etdi.
An’anaga ko‘ra, birinchi bo‘lib o‘yinlar asoschisi - Gretsiya jamoasi suzib o‘tdi. Uning ortidan - qochqinlar jamoasi. Keyin delegatsiyalar alifbo tartibida paydo bo‘ldi. Qayiqlar marshruti taxminan 6 km bo‘ldi va yakuniy shou Trokadero maydonida bo‘lib o‘tdi.
Olimpiada mash’alasini dzyudochi Teddi Riner va yengil atletikachi Mari-Joze Perek yoqdi – mash’ala bilan shar Fransiya poytaxti osmoniga ko‘tarildi. Bu 1783 yil voqealariga ishora - o‘sha paytda fransuzlar Jozef-Mishel va Jak-Etenn Mongolfe tomonidan ixtiro qilingan havo sharida birinchi parvoz sodir bo‘lgan. Shundan so‘ng qo‘shiqchi Selin Dion Edit Piafning LʼHymne a lʼamour qo‘shig‘ini ijro etdi.
Tashkilotchilarga ko‘ra, ochilish marosimini 320 mingga yaqin kishi, jumladan, 100 ga yaqin davlat va hukumat rahbarlari tomosha qilgan. To‘rt soatga yaqin davom etgan shouda 3000 ga yaqin aktyor va raqqoslar ishtirok etdi.
Rossiya va Belarussiz Parijdagi Olimpiya o‘yinlari
Rossiya va Belarus jamoalari Moskvaning Minsk ko‘magida Ukrainaga qarshi olib borayotgan urushi sababli Parij Olimpiadasida qatnashmadi. Shunga qaramay, 15 nafar rossiyalik va 17 nafar belaruslik sportchi neytral maqomda Olimpiada musobaqalariga qabul qilindi. Ular sportchilar paradida ishtirok etmadilar.
Avvalroq, shuningdek, Rossiya telekanallari 40 yil ichida birinchi marta Olimpiada o‘yinlarini ko‘rsatmasligi ma’lum bo‘lgan edi. Bu oxirgi marta 1984 yilda, SSSR terma jamoasi Los-Anjyelesdagi Olimpiadani boykot qilganida sodir bo‘lgan edi.
O‘zbekiston ilk bor 90 nafar sportchi bilan qatnashadi
Parij-2024 – O‘zbekiston delegatsiyasi mustaqil davlat sifatida ishtirok etadigan sakkizinchi yozgi Olimpiya o‘yinlariga aylanadi. O‘zbekiston delegatsiyasi litsenziyalar bo‘yicha o‘z rekordini yangilab, ilk bor 19 sport turida, 90 nafar sportchi bilan 75 ta yo‘llanmaga sazovor bo‘ldi. Bungacha rekord 1996 yilgi Olimpiadaga tegishli bo‘lib, o‘shanda Atlantadagi musobaqalarda o‘zbekistonlik 71 nafar sportchi qatnashgan edi.
Parijda Olimpiada-2024
Parijdagi XXXIII yozgi Olimpiya o‘yinlari 2024 yilning 26 iyulidan 11 avgustiga qadar bo‘lib o‘tadi. Ularda sportning 32 turi bo‘yicha 329 ta sovrinlar jamlanmasi uchun kurash olib boriladi. Odatdagi olimpiya turlaridan tashqari, Fransiyadagi o‘yinlarda breyk-dans, sport uslubida toqqa chiqish, skeytbording va serfing bo‘yicha o‘yinlar o‘tkaziladi. Serfing musobaqalari Tinch okeani janubida, Parijdan 15 000 kilometr uzoqlikda joylashgan Fransiya Polineziyasida bo‘lib o‘tadi.
