Ukraina o‘z hududi orqali «Lukoyl»dan Rossiya neftining tranzitini taqiqlaganidan so‘ng, Vengriya qarshi choralarni e’lon qildi. «Biz Ukraina «Lukoyl» muammosini hal qilmaguncha Yevropa tinchlik jamg‘armasidan mablag‘ ajratilishiga to‘sqinlik qilamiz», dedi 23 iyul, seshanba kuni Vengriyaning ATV telekanaliga tashqi ishlar vaziri Peter Siyyarto. Vengriya ma’lumotlariga ko‘ra, gap 6,5 mlrd yevro haqida ketmoqda, u Ukrainaga qurol va o‘q-dorilar yetkazib berishga sarflanishi kerak.

Siyyarto Yevropa Ittifoqi Ukrainani Rossiyaning «Lukoyl» kompaniyasidan Sharqiy Yevropaga «Drujba» neft quvuri orqali keladigan neft ta’minotida cheklovini olib tashlashga ishontirishiga ishonch bildirdi. 

Mojaro Yevropa komissiyasi tomonidan ko‘rib chiqiladi 

Ukraina tomonidan «Lukoyl»ga qarshi joriy qilingan sanksiyalarning iyun oyida kuchaytirilishi YeIda xavotir uyg‘otmoqda. Yevropa komissiyasi, dpa xabariga ko‘ra, Vengriya va Slovakiyadan yozma bayonotda olingan ma’lumotlarni o‘rganmoqda. Ikki Sharqiy Yevropa davlati iltimosiga ko‘ra, 24 iyul, chorshanba kuni Yevropa Ittifoqining Savdo siyosati qo‘mitasi yig‘ilishi bo‘lib o‘tadi. 

Yevropa Ittifoqi allaqachon Rossiya Federatsiyasining Ukrainaga qarshi qurolli hujumi sababli joriy etilgan Rossiyadan neft importini bir muncha vaqt davomida taqiqlagan. Biroq, geografik joylashuvi tufayli, ayniqsa, Rossiya neft ta’minotiga bog‘liq bo‘lgan mamlakatlar uchun istisnolar mavjud. 

Iyun oyida Ukraina «Lukoyl»ga qarshi jazo choralarini kengaytirdi. Xususan, Kiyev Rossiya kompaniyasi mahsulotlarining Ukraina orqali «Drujba» quvuri orqali tranzitini taqiqladi. Natijada, Vengriya va Slovakiya o‘zlarining eng muhim neft yetkazib beruvchilaridan asosan uzildi. Ushbu quvur orqali «Lukoyl» Sharqiy Yevropa davlatlariga neft ta’minotining yarmiga yaqinini amalga oshiradi. Vengriya hukumatiga ko‘ra, Rossiyadan neft yetkazib berishni to‘xtatish iste’molchilar uchun yonilg‘i narxining oshishiga olib kelishi mumkin.

Rossiya yetkazib berishni davom ettirishga va’da bermoqda 

Rossiya hukumati rahbari o‘rinbosari, Rossiya sobiq energetika vaziri Aleksandr Novak Vengriya va Slovakiya neft olishda davom etishini aytdi, ammo bu qanday sodir bo‘lishi haqida izoh berishdan bosh tortdi. Avvalroq «Lukoyl»ning noaniq ma’lumotlariga tayanib, boshqa yo‘nalishlardan foydalanishi aytilgandi. «Drujba» quvurining bir qismi Belarus hududidan o‘tadi.