Bangladeshda talabalar tomonidan uyushtirilgan ommaviy norozilik namoyishlari chog‘ida kamida 105 kishi halok bo‘lgan, ularning yarmidan ko‘pi politsiya tomonidan otib ketilgan, deya xabar bermoqda G‘arb axborot agentliklari shifoxonalar ma’lumotiga tayanib. Mahalliy OAVga ko‘ra, 700 dan ortiq kishi, jumladan, 100 politsiyachi va 30 jurnalist yaralangan.
AP muxbiri xavfsizlik kuchlarining olomonga miltiqdan o‘q otganini, shovqinli granatalar uloqtirganini va ko‘zdan yosh oqizuvchi gaz ishlatganini ko‘rgan. Shundan so‘ng ko‘chalar qonga va o‘qlarga to‘lib ketdi, dedi jurnalist. BMT Inson huquqlari bo‘yicha oliy komissari Folker Turk Bangladeshda sodir bo‘layotgan voqealarni «dahshatga soluvchi va qabul qilib bo‘lmas» deb atadi va tergov o‘tkazilishi hamda aybdorlar jazolanishini talab qildi.
O‘z navbatida politsiyaning xabar berishicha, namoyishchilar Narsingdi okrugidagi qamoqxonani egallab, bir necha yuz mahbusni ozod qilgan, keyin esa uni yoqib yuborishgan. Bundan tashqari, namoyishchilar ko‘plab politsiya va hukumat binolarini, shuningdek, telekompaniyalar ofislarini vayron qilgan va yoqib yuborgan.
Butun mamlakat bo‘ylab komendantlik soati
Bangladesh hukumati butun mamlakat bo‘ylab komendantlik soati joriy qildi va norozilik namoyishlarini bostirish uchun armiya yubordi. Mamlakatda aloqa bilan bog‘liq muammolar mavjud. O‘tgan hafta Bangladeshdagi universitetlar yopildi, poytaxt Dakkada barcha yig‘ilishlar va namoyishlar taqiqlandi.
O‘tgan hafta Bangladeshda norozilik namoyishlari keng tarqaldi. Ish yo‘qligidan hafsalasi pir bo‘lgan talabalar davlat ish joylari 30 foizi Bangladeshning 1971 yildagi mustaqillik urushi faxriylari qarindoshlari uchun ajratiladigan kvota tizimini to‘xtatishni talab qilmoqda. Xususiy sektorning rivojlanishiga qaramay, davlat xizmati mamlakatda barqaror va jozibador hisoblanadi. Har yili 400 mingga yaqin bitiruvchi 3000 ta o‘ringa hujjat topshiradi.
2018 yilda talabalarning avvalgi ommaviy norozilik namoyishlaridan so‘ng hukumat kvota tizimini to‘xtatib qo‘ydi, biroq iyun oyida Bangladesh Oliy sudi faxriylar qarindoshlarining shikoyatlarini qanoatlantirdi va kvotalar qayta tiklandi. Sud qarori ustidan apellyatsiya shikoyati berilgan, qaror 21 iyul kuni chiqishi kutilayotgandi. Tarafdorlari kvota tizimidan foydalanayotgan bosh vazir Shayx Hasina Vazed barchani sud qarorini sabr bilan kutishga chaqirdi.
