“Bunday masalalar bilan shug‘ullanadigan aql markazlari bo‘lishi kerak” - Abdurahmon Tashanov oiladagi zo‘ravonliklar haqida

Inson huquqlari “Ezgulik” jamiyati raisi Abdurahmon Tashanov Kun.uz muxbiri bilan jamiyatdagi zo‘ravonlik holatlari, o‘lim jazosi muhokamalari xususida o‘tgan suhbatda ayni fikrlarni bildirdi.

“Nega bizda ilmiy tadqiqot institutlari yo‘q, sotsiologlar vaziyatni o‘rganmaydi? Ko‘pchilik televideniyedagi seriallarni yomonlaydi, lekin mana shu seriallar ham hayotdan olinadi-ku. Bu bir-birini taqozo qiladigan muammo, hayotning aksi televideniyeda ko‘rinadi, televideniyedagi narsa hayotga ko‘chadi.

Bunday vaziyatda eng katta mas’uliyat davlatga tushadi. Davlat aql markazlariga pul sarflashi kerak. Masalan, AQShda Karnegi instituti kabi juda katta pullar sarflanadigan aql markazlari bor. Yoki Yevropada ham qanday aql markazlari bor? Nima uchun bizning “Ijtimoiy fikr” degan markazlarimiz faqat davlatning buyurtmalariga ishlaydi? Shu paytgacha jamiyatdagi depression vaziyatni ko‘rsatuvchi biror mustaqil tashkilotni ko‘rmadik”, – deydi u.

Muhokamada qatnashgan O‘zJOKU rektori Sherzodxon Qudratxo‘ja ham Tashanovning fikrlarini qo‘llab-quvvatladi.

“Bu jiddiy-jiddiy institutlar, jiddiy-jiddiy aql markazlari ishlaydigan mavzu. Bu hashaki mavzu emas, ma’lum tashkilotlar bu borada ishlashi kerak”, – dedi Qudratxo‘ja.