Germaniya bu yil mudofaa ehtiyojlari uchun rekord darajada 90,6 milliard yevro ajratadi va buning natijasida NATO normasi - yalpi ichki mahsulotning ikki foizlik ko‘rsatkichni ortig‘i bilan bajaradi. 18 iyun, seshanba kuni e’lon qilingan NATO prognoziga ko‘ra, Germaniya tomonidan ajratiladigan mablag‘ YaIMning 2,12 foizini tashkil qiladi.
Rossiyaning Ukrainaga qarshi urushi fonida bu yil Germaniya birinchi marta NATOning 2014 yilda belgilangan YaIM ikki foizi miqdoridagi harbiy xarajatlar normasiga javob beradi. Umuman olganda, alyansning 32 davlatidan 23 tasi belgilangan kvotani bajarishi kerak, dedi alyans bosh kotibi Yyens Stoltenberg.
«NATO bo‘yicha ittifoqchilar joriy yilda mudofaa xarajatlarini 18 foizga oshirmoqda, bu o‘n yilliklardagi eng katta o‘sishdir», dedi u 17 iyun kuni kechqurun Oq uyda AQSh prezidenti Jo Baydenga. Stoltenberg Vashingtonga alyans tashkil etilganining 75 yilligiga bag‘ishlangan yubiley sammitiga tayyorgarlik ko‘rish uchun kelgan. Uchrashuv iyul oyida AQShda bo‘lib o‘tadi.
NATOning mudofaa xarajatlari
2014 yilda NATOning faqat uchta davlati ikki foizlik normaga amal qilgan – AQSh, Britaniya va Gretsiya. O‘tgan yili 11 davlat kvotani bajargan yoki oshirib yuborgan. Germaniya bu yil birinchi marta standartni bajarishga va’da berdi.
Baydenning AQShda bo‘lajak prezidentlik saylovlaridagi raqibi, sobiq prezident Donald Tramp saylovoldi tashviqoti davomida ittifoqchilarni mudofaa xarajatlarini oshirishga qayta-qayta chaqirgan. Fevral oyida u Rossiya tomonidan hujumga uchrasa, Qo‘shma Shtatlar harbiy ehtiyojlar uchun yetarli mablag‘ sarflamagan ittifoqchilarga yordamga kelmasligi bilan tahdid qilgan. Tramp buning o‘rniga Rossiyani bunday ittifoqchilar bilan xohlaganini qilishga undashini aytdi.
Stoltenberg Welt gazetasiga bergan intervyusida Trampni himoya qildi va bunday bayonotlari bilan u NATO mamlakatlari xavfsizligiga raxna solmasligini aytdi. «Donald Tramp NATOni tanqid qilmadi, uning tanqidi NATOga yetarlicha sarmoya kiritmayotgan alyans a’zolariga qaratilgan edi», deb tushuntirdi Stoltenberg.
