12 iyun, chorshanba kuni Lyuksemburgdagi Yevropa Ittifoqi umumiy yurisdiksiya sudi Rossiyaning VEB.RF davlat korporatsiyasining YeI kengashiga qarshi da’vosini rad etdi. Da’vo arizasida Yevropa Ittifoqining sanksiyalar ro‘yxatidan chiqarib tashlash so‘ralgan. «Da’vo rad etildi VEB.RF davlat taraqqiyot korporatsiyasi o‘z xarajatlaridan tashqari, Yevropa Ittifoqi kengashi tomonidan qilingan xarajatlarni to‘lashi kerak», deyiladi sud qarorida.
AQSh: VEB Rossiya mudofaa qobiliyatini saqlab qolishda alohida rol o‘ynaydi
Yevropa Ittifoqining VEBga qarshi sanksiyalari 2022 yil fevralida Rossiyaning Ukrainaga qarshi harbiy hujumi boshlanganidan so‘ng deyarli darhol joriy qilingan. O‘shanda AQSh Moliya vazirligi davlat korporatsiyasi Rossiya va uning iqtisodiyoti mudofaa qobiliyatini saqlashda alohida rol o‘ynaydigan davlat organi ekanligini ta’kidlagan. VEB.RF, shuningdek, davlat qarziga xizmat ko‘rsatgan, eksportni moliyalashtirgan, investitsiya va infratuzilma loyihalarini amalga oshirgan. 2022 yil mart oyida Yevropa Ittifoqi VEB.RFni xalqaro banklararo SWIFT tizimidan uzishga qaror qildi. Davlat korporatsiyasi sanksiyalar va SWIFT’dan uzilish ustidan Yevropa Ittifoqi sudida e’tiroz bildirishga harakat qildi. Bu ish bo‘yicha sud majlislari 2024 yil yanvar oyida bo‘lib o‘tgan.
Sud materiallaridan ma’lum bo‘lishicha, davlat korporatsiyasi unga nisbatan kiritilgan cheklov choralariga e’tiroz bildirgan bo‘lib, Yevropa Ittifoqi qarori qabul qilinganda, «e’tiroz qilingan qoidalar asos bo‘lgan faktlarni baholashda aniq xatolarga yo‘l qo‘yilgan»ligini ko‘rsatgan. Shu munosabat bilan VEB.RF sanksiyalar ro‘yxatiga kiritilishi haqidagi qarorni bekor qilishni, shuningdek, YeI kengashini sud jarayoni bilan bog‘liq holda kompaniya ko‘rgan xarajatlarni to‘lashga majburlashni talab qildi.
YeI yangi sanksiyalar paketini tayyorlamoqda
Rossiyaning Ukrainaga qarshi urushi boshlanganidan beri YeI kengashi 13 ta sanksiya paketini ma’qulladi, ikki mingdan ortiq jismoniy va yuridik shaxslar cheklovlar ostida qoldi. Cheklov choralari Yevropa Ittifoqi mamlakatlaridagi aktivlarni muzlatish bilan bog‘liq. Jismoniy shaxslarga qo‘shimcha ravishda sayohat taqiqlanadi, bu esa ularning Yevropa Ittifoqiga kirishiga yoki Yevropa Ittifoqi orqali tranzit o‘tishiga to‘sqinlik qiladi. Hozirda 14-sanksiya paketi kelishib olinmoqda. EUobserver ma’lumotlariga ko‘ra, Rossiya va xorijiy 52 kompaniya cheklovlarga duchor bo‘ladi. Iyulgacha yangi sanksiyalar bo‘yicha kelishib olish rejalashtirilmoqda.
