Qo‘shma Shtatlar Italiyadagi G7 sammiti arafasida Rossiyaning Ukrainadagi urushiga qarshi qaratilgan yangi sanksiyalar paketini e’lon qildi. Moskvaga kiritilgan cheklovlarni chetlab o‘tishga yordam bergan yana 33 kishi va 300 ga yaqin kompaniya va tashkilotlar qora ro‘yxatga kiritilgan. 12 iyun, chorshanba kuni e’lon qilingan AQSh Moliya vazirligi xabariga ko‘ra, cheklovlar qo‘yilgan yuridik shaxslar orasida Xitoy, Turkiya, Qozog‘iston, Qirg‘iziston, Bolgariya, Serbiya, Birlashgan Arab Amirliklari, Belarus va Britaniya Virjiniya orollari kompaniyalari bor.
Shuningdek, Rossiya valuta bozorida dollar savdosida vositachi bo‘lgan bir qator Rossiya moliya institutlariga, xususan, Moskva birjasi, Milliy kliring markazi (MKM) va Milliy hisob-kitob depozitariysiga nisbatan ham sanksiyalar joriy etildi.
Amerika Moliya vazirligi ma’lumotlariga ko‘ra, Rossiya hukumatining Moskva birjasiga kapitalni jalb qilish choralari Rossiya Federatsiyasi va boshqa mamlakatlar fuqarolari uchun «Rossiya suveren qarziga sarmoya kiritish orqali Kreml harbiy mashinasidan foyda olish imkoniyatlarini kengaytiradi».
Dollar tizimidan izolyatsiya tahdidi
Ixtisoslashgan Telegram-kanallar ta’kidlashicha, Moskva birjasi va MKMga qarshi sanksiyalar dollar tizimidan izolyatsiya bilan tahdid soladi, jumladan, dollar va yevro bilan savdo to‘xtatilishi orqali.
Moskva birjasi 13 iyundan boshlab platformada dollar va yevroda savdo o‘tkazmasligi haqida xabar bergan edi. Shu bilan birga, u guruhda o‘zgaruvchanlik sharoitida uzluksiz savdoni ta’minlash uchun zarur vositalar mavjudligiga ishontirdi.
Yangi sanksiya ro‘yxatidagilar
«Sogaz» sug‘urta kompaniyasi va Rossiya milliy qayta sug‘urta kompaniyasi ham AQSh cheklovlari ostida qoldi. 100 dan ortiq yuridik va jismoniy shaxslar Rossiya energetika, metallurgiya va tog‘-kon sanoatida ishlab chiqarish va eksport salohiyatini rivojlantirish bilan shug‘ullanayotgani, shuningdek, ilgari kiritilgan cheklovlarni chetlab o‘tishga yordam bergani sababli ro‘yxatga kiritilgan, deya tushuntiradi AQSh Moliya vazirligi. Yangi jazolar, shuningdek, bunday kompaniyalar uchun ikkilamchi sanksiyalar xavfini oshirishga qaratilgan.
Qora ro‘yxatga, shuningdek, rossiyalik ishlab chiqaruvchi uchun oltin yuvish bilan shug‘ullanuvchi, dron ishlab chiqarishni qo‘llab-quvvatlovchi, Rossiyaning kimyoviy va biologik qurollar dasturi uchun nozik va muhim materiallarni sotib oluvchi o‘ndan ortiq transmilliy tarmoqlar ham kiritilgan. Qo‘yilgan sanksiyalar, shuningdek, Rossiyaning suyultirilgan gaz sotishdan keladigan daromadlarini cheklashga qaratilgan, deya ta’kidladi Qo‘shma Shtatlar Moliya vazirligi.
AQSh moliya vaziri Janet Yyellen so‘zlariga ko‘ra, cheklovlar Rossiyaning materiallar va asbob-uskunalarni olish bo‘yicha imkoniyatiga, jumladan, uchinchi davlatlardan muhim ta’minotga bog‘liqligiga zarba bo‘ladi. «Biz Rossiyaning urush iqtisodiyotiga jalb qilingan moliyaviy institutlar uchun xavfni oshiramiz va sanksiyalarni chetlab o‘tish yo‘llarini yo‘q qilamiz, shuningdek, Rossiyaning xorijiy texnologiyalar, uskunalar, dasturiy ta’minot va AT xizmatlaridan foydalanish imkoniyatini kamaytiramiz», - deyiladi AQSh bayonotida.
