22 may, chorshanba kuni Meksikaning Nuevo-Leon shtatida Meksika prezidentligiga nomzod Xorxe Maynes tomonidan uyushtirilgan saylovoldi mitingi chog‘ida sahnaning qulashi oqibatida 9 kishi halok bo‘ldi. Bu haqda shtat gubernatori Samuel Garsiya X ijtimoiy tarmog‘ida ma’lum qildi. «Men hozirgina 7-klinikaga tashrif buyurdim va afsusdamanki, ayni damda baxtsiz hodisa oqibatida halok bo‘lganlar soni - 8 nafar kattalar va 1 nafar voyaga yetmagan», — deb yozgan Garsiya. So‘nggi ma’lumotlarga ko‘ra, hodisa natijasida 63 kishi jarohatlangan, deb yozadi ABC Noticias mahalliy nashri Garsiyaning so‘zlariga tayanib. 

San-Pedro-Garsa-Garsiya shahrida sodir bo‘lgan fojiaga kuchli shamol sabab bo‘ldi - avval u dekoratsiyani, keyin esa butun sahnaning tayanch inshootlarini buzib yubordi. 38 yoshli Meksika prezidentligiga nomzod sahnaga chiqqanida, shamol siyosatchi va uning tarafdorlari ortidagi katta ekranni uchirib yuborgan. 

Meksika prezidentligiga nomzod jabrlanmadi

Maynesning o‘zi voqeadan so‘ng kasalxonaga borib, yaxshi ekanini ma’lum qilgan. «Ayni damda muhim bo‘lgan yagona narsa bu - hodisa qurbonlariga yordam berishdir», deb yozadi siyosatchi ijtimoiy tarmoqlarda. 

2 iyun kuni Meksikada prezidentlik va parlament saylovlari bo‘lib o‘tadi. Reuters agentligining ta’kidlashicha, so‘l markazchi «Fuqarolik harakati» partiyasi a’zosi 38 yoshli Xorxe Maynes saylovoldi so‘rovlarida hukmron «Milliy uyg‘onish harakati»dan prezidentlik poygasida yetakchi nomzod Klaudiya Sheynbaumdan ancha ortda qolgan holda uchinchi o‘rinni egallab turibdi.