Kyolndagi Germaniya iqtisodiyoti instituti (IW) tomonidan 19 may, yakshanba kuni e’lon qilingan tadqiqotga ko‘ra, Germaniyaning Yevropa Ittifoqidan chiqishi – Dexit – mamlakatda atigi besh yil ichida 2,5 million ish joyini yo‘qotilishi va YaIM 5,6 foizga pasayishiga olib kelishi mumkin.
Tahlilchilarning fikricha, agar mamlakat 2029 yilgacha YeIdan chiqsa, jami 690 milliard yevro yo‘qotadi. Buning sababi Germaniyaning Yevropa Ittifoqidagi hamkorlar bilan savdoga bog‘liqligidir. Germaniyaning Dexit doirasidagi iqtisodiy ishlab chiqarish yo‘qotishlari 2020 yildan 2023 yilgacha bo‘lgan davrda energiya xarajatlari keskin o‘sishi tufayli koronavirus pandemiyasi davridagiga o‘xshash bo‘ladi, deya ogohlantiradi tadqiqot mualliflari.
Shuning uchun Brexit «taqlid qilishga arziydigan tashabbus emas», deb ogohlantiradi IW boshqaruvchi direktori Hubertus Bardt. Aksincha, Brexit - «Yevropa Ittifoqiga a’zo boshqa davlatlarga iqtisodiy integratsiyadan o‘ylamasdan voz kechish haqida ogohlantirish», deb ta’kidlaydi u.
GuM deputatlari Brexit’ni «Germaniya uchun namuna» deb biladi
2024 yil yanvar oyida Britaniyaning Financial Times gazetasi bilan suhbatda «Germaniya uchun muqobil» (GuM) o‘ng qanot populistik partiyasi rahbari Alis Vaydel, agar Germaniya hukumati GuM tomonidan boshqarilsa, YeI vakolatlarini cheklashga harakat qilishi hamda Yevropa Ittifoqidan chiqish bo‘yicha referendum o‘tkazishga tayyor bo‘lishini aytdi. U Germaniyaning Yevropa Ittifoqidan chiqishi rejasini taqdim etdi, bu Britaniya Brexit’iga o‘xshash tarzda Dexit deb nomlanadi.
