RF Bosh prokuraturasi SOTA media tashkilotining Rossiyadagi faoliyatini «nomaqbul» deb topdi. U chop etayotgan materiallar Rossiyadagi ijtimoiy-siyosiy vaziyatni beqarorlashtirishga qaratilgan, deya ma’lum qildi departament 16 may, payshanba kuni Moskvada. Bundan tashqari, Bosh prokuratura SOTA nashrlari voqelikni buzib ko‘rsatishi hamda «jamiyatda keskinlik va g‘azabni» keltirib chiqarishini da’vo qilmoqda.
Shu bilan birga, Moskva SOTA media’ni G‘arb tomonidan rag‘batlantirilgan holda «rus jamiyatining ma’naviy va axloqiy asoslarini buzish» maqsadini ko‘zlaganlikda aybladi. Departamentga ko‘ra, tashkilot veb-saytida Rossiya hukumati va RF Qurolli kuchlarini obro‘sizlantiradigan «muntazam ravishda tarqatilgan materiallar» mavjud. Shu bilan birga, Rossiya Federatsiyasi Bosh prokuraturasi SOTA media rahbariyati «faoliyati Rossiyada nomaqbul deb tan olingan SIA TV Rain va The Insider xorijiy nodavlat tashkilotlarining ko‘rsatmalariga binoan harakat qilmoqda» degan bayonot berdi.
Bosh prokuraturaning qaroriga javoban SOTA tahririyati uning «Dojd» telekanali va The Insider nashriga, shuningdek, «G‘arb kuratorlari»ga aloqasi yo‘qligini bildirdi. «Biz, albatta, urush va rejimga muxolifmiz hamda ishimizda obektiv jurnalistik me’yorlarga amal qilamiz», — deyiladi Telegram’da e’lon qilingan bayonotda.
Rossiyada faoliyati «nomaqbul tashkilotlar»
«Nomaqbul tashkilotlar» maqomi Rossiya qonunchiligida 2015 yildan beri qonuniy ravishda mavjud. Ularga Rossiya Federatsiyasi hududida ma’muriy va jinoiy javobgarlik tahdidi ostida faoliyat yuritish taqiqlanadi. Ushbu tashkilotlar bilan hamkorlik qilganlik uchun ma’muriy va jinoiy javobgarlik ham nazarda tutilgan.
Hozirda «nomaqbullar» ro‘yxatida 160 ga yaqin tashkilot mavjud bo‘lib, ularning aksariyati Britaniya, Germaniya, AQSh va Ukrainada joylashgan. Ro‘yxatga oxirgi vaqtlarda «Urushga qarshi feministik qarshilik», Boris Nemsovning Ozodlik uchun jamg‘armasi, Germaniyaning Fridrix Naumann nomidagi ozodlik jamg‘armasi va Ukraina fuqarolik erkinliklari markazi, shuningdek, Germaniya Kopelev jamg‘armasi kiritilgan.
