Polsha chegarachilari Rossiya armiyasidan qochib ketgan rossiyalik askarni qo‘lga oldi. Polsha chegara xizmatining 8 may, chorshanba kuni xabar berishicha, 41 yoshli erkak bir guruh muhojirlar bilan birga Belarus-Polsha chegarasini noqonuniy kesib o‘tgan va Polsha hududida qo‘lga olingan. 

Departament xodimlari qo‘lga olingan shaxsdan uning Rossiya armiyasidagi xizmati va Ukrainaga qarshi urushda qatnashganligini tasdiqlovchi harbiy hujjatlarni topdi. Polshaning Rmf.fm radiostansiyasi xabar berishicha, rossiyalik qurolsiz va fuqarolik kiyimida bo‘lgan, muhojirlar orasida yurgan. Rmf.fm ma’lumotlariga ko‘ra, qo‘lga olinganning harbiy hujjatlari orasida armiya bilan tuzilgan shartnoma ham bor edi, ehtimol u Belarus orqali to‘g‘ridan to‘g‘ri frontdan Polsha hududiga kirmoqchi bo‘lgan.

Hozirda rossiyalik chegara xizmati tomonidan qo‘lga olingan va unga nisbatan tergov harakatlari olib borilmoqda. Polsha ichki ishlar vaziri o‘rinbosari Cheslav Mrochek PAP axborot agentligiga bergan intervyusida shunday dedi: «Biz uning niyati nima ekanligini aniqlashimiz kerak. Gap Rossiya razvedka xizmatlarining buyrug‘ini bajarish haqida ketyaptimi yoki yo‘qmi, shu masala muhim».

Polsha-Belarus chegarasidagi inqiroz

2021 yilning yozidan buyon o‘n minglab kishilar Belarus hududidan Polshaga noqonuniy kirishga harakat qilyapti. Yevropa Ittifoqi Belarus rahbari Aleksandr Lukashenkoni G‘arbga bosimni kuchaytirish maqsadida Yaqin Sharq va Afrikadan migrantlarni YeI chegaralariga o‘tkazishni uyushtirganlikda aybladi. 

2022 yilda Polsha Belarus bilan chegaradosh tomonida balandligi 5,5 metr bo‘lgan panjara va elektron kuzatuv tizimini o‘rnatdi. Biroq chegara to‘siqlari qurilganidan keyin ham muhojirlar har kuni Yevropa Ittifoqining tashqi chegarasini noqonuniy kesib o‘tishga urinmoqda, deya qayd etadi Polsha rasmiylari. Yil boshidan beri Polsha chegara xizmati 10 mingdan ortiq bunday urinishlarni qayd etgan.