Qirg‘iziston Vazirlar Mahkamasi rahbari Oqilbek Japarov mamlakatda ommaviy tadbirlar o‘tkazishga bolalarni jalb qilishni taqiqlash bo‘yicha topshiriq berdi. U Vazirlar Mahkamasi apparati yig‘ilishida shunday ko‘rsatma bergan, deb yozdi Kaktus. 

2 may kuni respublikaning Suzoq viloyatidagi maktab o‘quvchilari o‘rtasida musobaqa bo‘lib o‘tayotgan joyda yuk mashinasi bolalarni urib yuborgan edi. Haydovchining so‘zlariga ko‘ra, u mashinani tark etgan va uning qanday harakatlana boshlaganini sezmay qolgan. Keyin esa uning ortidan yetib olishga va to‘xtatishga ulgurmagan. Oqibatda transport vositasi bolalarni urib yuborgan. Haydovchi hibsga olingan, ammo keyinchalik uy qamog‘i sharti bilan qo‘yib yuborilgan. 

Qirg‘iziston Sog‘liqni saqlash vazirligi ma’lumotlariga ko‘ra, hodisada 32 nafar bola jarohat olgan.