Varshava hukumati Ukrainaga Rossiyaning keng miqyosli hujumi boshlanganidan keyin Polshaga kelgan 18 yoshdan 60 yoshgacha bo‘lgan fuqarolarini qaytarishda yordam berishga tayyor. Bu haqda 24 aprel, chorshanba kuni Polsha mudofaa vaziri Vladislav Kosinyak-Kamish Polsat News telekanalida aytib o‘tdi.
Agar Kiyev pasport muddati tugaganidan keyin Polshada qolish huquqidan mahrum bo‘lishi mumkin bo‘lganlarni vataniga qaytarishga yordam berishni so‘rasa, Polsha rasmiylari qanday munosabatda bo‘ladi, degan savolga u: «Har qanday yordam berish ehtimoli bor», deb javob berdi. Polsha Mudofaa vazirligi rahbari Varshava uzoq vaqtdan beri Kiyevga harbiy xizmatga majbur va Ukrainaga qaytishi kerak bo‘lgan fuqarolarni aniqlashda yordam taklif qilgan, deya eslatdi. U bu ukrainalik erkaklarning «fuqarolik burchi» ekanligini ta’kidladi. Bu muammoni hal qilishda Kiyevga yordam berishning o‘ziga xos shakli «ko‘p jihatdan Ukraina tomoniga bog‘liq», deya qo‘shimcha qildi vazir.
Chaqiruv yoshidagi ukrainaliklar uchun konsullik xizmatlarini cheklash
23 apreldan boshlab Ukraina Tashqi ishlar vazirligi 18 yoshdan 60 yoshgacha bo‘lgan erkak fuqarolari uchun xorijiy konsulliklarda hujjatlarni rasmiylashtirishni to‘xtatdi. Shuningdek, chaqiruv yoshidagi ukrainaliklarga chet el pasportlari berilmasligi ma’lum qilindi. Bu safarbarlik to‘g‘risidagi yangi qonun va Kiyevning armiya sonini oshirish istagi bilan bog‘liq.
«Ukraina tashqi ishlar vazirining bunday qarorga kelganidan hayron emasman, chunki Ukraina hukumati yangi askarlarni frontga jo‘natish uchun hamma narsani qilmoqda», - deya izoh berdi Polsha mudofaa vaziri. «O‘ylaymanki, ko‘plab vatandoshlarimiz ukrainalik yigitlarni kafelarda ko‘rib, Ukrainaga yordam berish qanchalar qimmatga tushayotganini eshitib, hayratda qoldi», dedi u.
«Frontdagi ukrainaliklarning dunyo bo‘ylab tarqalib ketgan vatandoshlariga qarshi haqli da’volari meni ajablantirmaydi», deb qo‘shimcha qildi Vladislav Kosinyak-Kamish.
YeIdagi ukrainalik erkaklar
Ukraina Tashqi ishlar vazirligi 24 aprel kuni chaqiruv yoshidagi erkaklarga konsullik xizmatlari ko‘rsatish to‘xtatilganini e’lon qilganidan so‘ng, Kiyev qaroridan g‘azablangan yuzlab ukrainaliklar Varshavada yopiq pasport idorasi oldiga to‘plandi.
Germaniya Ichki ishlar vazirligi matbuot kotibi Maksimilian Kal 24 aprel kuni DW telekanalining Kiyev qarori ehtimoliy oqibatlari haqidagi savoliga javob berar ekan, shunday dedi: «Ishonchim komilki, bu Ukrainadan himoyaga muhtoj qochqinlar maqomiga ta’sir qilmaydi. Bunday qochqinlar orasida mutlaq ko‘pchilikni tashkil etuvchi ayollar yoki erkaklar haqida gap ketayotganidan qat’i nazar».
Bryussel hisob-kitoblariga ko‘ra, 2024 yil boshida Yevropa Ittifoqi mamlakatlarida 4,3 millionga yaqin Ukraina fuqarolari bo‘lgan, ulardan 860 mingga yaqini - erkaklar.
