Kun.uz manbasiga ko‘ra, yong‘in 11 aprel kuni soat 10:00 larda muzeyning ikkinchi qavatidagi ekspozitsiya zalida sodir bo‘lgan. Yong‘in jamoatchilikdan sir tutilgan.

Kun.uz muxbiri bilan suhbatlashgan Farg‘ona viloyati tarixi va madaniyati davlat muzeyi rahbari Xayrullo Zokirov muzeyda yong‘in sodir bo‘lganini tasdiqladi. Mas’ulning aytishicha, 1985 yilda qurib foydalanishga topshirilgan muzey binosida yong‘in eskirgan elektr simlarining qisqa tutashuvi ortidan kelib chiqqan.

Yong‘inda faqat 1 dona vitrina yonib, miltiq qo‘ndog‘i va naqshli eshik butkul yonib ketgan. Vitrina va muzeyning yongan qismi esa ta’mirlangan. Rassom Gavrilov tomonidan 1938 yilda chizilgan, 1916 yil qo‘zg‘oloni aks etgan san’at asari qisman zararlangan.

Muzey rahbari holat viloyat badiiy ekspertizasi xodimlari tomonidan o‘rganilayotgani sababli ichkariga kirishga ruxsat bermadi. Uning qo‘shimcha qilishicha, ayni paytda yetkazilgan moddiy zarar miqdori o‘rganilyapti.

Avvalroq Farg‘ona viloyati tarixi va madaniyati davlat muzeyida saqlanayotgan umumiy bahosi 2,5 mlrd so‘mlik 70 ta noyob eksponat qalbakilashtirilgani ma’lum bo‘lgandi. Shuningdek, muzeyni kapital ta’mirlash uchun budjetdan ajratilgan 3,1 mlrd so‘m mablag‘ning 1,4 mlrd so‘mi mansabdor shaxslar tomonidan talon-toroj qilingani aniqlangan edi.