Surxondaryo viloyati hokimining moliya-iqtisodiyot va kambag‘allikni qisqartirish masalalari bo‘yicha yangi birinchi o‘rinbosari tayinlandi.

Viloyat hokimligi xabariga ko‘ra, ushbu lavozimida ishlab kelgan Anvar Oripov boshqa ishga o‘tishi munosabati bilan uning o‘rnida Sherzod Rajabov ish boshladi.

Sh.Rajabov 1984 yil Qiziriq tumanida tug‘ilgan. 2007 yilda Termiz davlat universitetini, 2014 yilda Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi – iqtisodchi.

U mehnat faoliyati davomida Surxondaryo viloyati hokimligi guruh rahbari, Uzumchilikni rivojlantirish agentligining bo‘lim boshlig‘i, direktor o‘rinbosari, Alkogol va tamaki bozorini tartibga solish agentligi direktorining o‘rinbosari lavozimlarida mehnat qilgan.

Mazkur lavozimga tayinlangunga qadar 2023 yildan buyon Qiziriq tumani hokimi lavozimida faoliyat yuritayotgan edi.