Britaniya AQShdan keyin Rossiya alyuminiy, mis va nikel importiga embargo joriy qildi. 12 aprel, juma kuni e’lon qilingan AQSh Moliya vazirligi va Britaniya hukumati veb-saytlaridagi bayonotlarga ko‘ra, Chikago va Londondagi birjalarda ushbu metallar bilan savdo qilish taqiqlanadi. AQSh Moliya vazirligining aniqlik kiritishicha, cheklovlar taqiq kuchga kirgunga qadar qazib olingan metallarga taalluqli emas.

Rossiya dunyoda nikelning taxminan 6 foizi, alyuminiyning 5 foizi va misning 4 foizini ishlab chiqaradi. Bloomberg qayd etishicha, London metall birjasi (LME) omborlarida 2024 yilning mart oyi oxiri holatiga ko‘ra, Rossiya alyuminiyi zaxiralarning 96 foizini, nikel – 62 foizini va misi – 36 foizini tashkil qilgan. Britaniya hukumati hisob-kitoblariga ko‘ra, Rossiyaning Ukrainaga keng ko‘lamli hujumi ortidan metall eksportidan tushgan daromadi 25 milliard dollardan 15 milliard dollargacha kamaygan. Qabul qilingan chora-tadbirlar ushbu miqdorni kamaytirishga qaratilgan.

Yevroittifoq RFdan metallarga nisbatan sanksiyalar kiritishga shoshilmayapti 

Shu bilan birga, Rossiya Federatsiyasidan metall importi Rossiya va Yevropa Ittifoqi o‘rtasidagi savdoning asosiy yo‘nalishlaridan biri bo‘lib qolmoqda. 2023 yil oxiridagi ma’lumotlarga ko‘ra, Ukrainada urush boshlanganidan beri Rossiya metallarining Yevropa Ittifoqiga importi 13,7 milliard yevroni tashkil qilgan. Rossiya metallarining eng yirik xaridorlari orasida Germaniyaning GGP Metal Powder (urush boshlanganidan beri 66 million dollarlik mis), Fransiyaning qurol ishlab chiqaruvchi Safran (25 million dollarlik titan) va Niderlandiyaning C. Steinweg logistika firmasi (100 million dollarlik turli metallar) bor. 

Avvalroq ko‘plab ekspertlar Rossiya metallari savdosini taqiqlash Yevropa Ittifoqi sanksiyalarining keyingi paketlaridan biriga kiritilishi haqida fikr bildirgandi.