Yevroparlament Yevropa Ittifoqining boshpana to‘g‘risidagi qonunini keng qamrovli isloh etish bo‘yicha yakuniy qarorini qabul qildi. 10 aprel, chorshanba kuni Bryusselda YeP a’zolari 2015 yildagi migratsiya inqirozidan beri muhokama qilinayotgan ushbu islohot doirasida barcha o‘nta qonunchilik tashabbusini qabul qildi.
Qonunlar to‘plami, jumladan, tashqi chegaralarda boshpana izlovchilar uchun tartib-qoidalarni tezlashtirishni nazarda tutadi. Yevropa Ittifoqida qolish imkoniyati kam bo‘lganlar chegarada qabul qilingan qarorlar bilan tezroq deportatsiya qilinadi.
Islohotning tarkibiy qismlaridan biri boshpana izlovchilarni Yevropa Ittifoqi davlatlari o‘rtasida taqsimlash bo‘yicha birdamlik mexanizmi hisoblanadi. Bu shuni anglatadiki, migrantlar Yevropa Ittifoqiga kirgan birinchi mamlakatlarda - Italiya, Gretsiya, Ispaniya, Kipr, Maltada - boshpana izlovchilar soni haddan tashqari ko‘p bo‘lsa, boshqa Yevropa Ittifoqi mamlakatlari boshpana izlovchilarni kvota tizimi bo‘yicha qabul qilishga majbur bo‘ladi. Agar biron-bir davlat qochqinlarni qabul qilishdan bosh torsa, ular moliyaviy yordam ko‘rsatishi mumkin. Bundan tashqari, immigratsiya oqimi keskin oshgan hollarda harakat qilish tartibga solindi.
Metsola: Birdamlik va mas’uliyat o‘rtasidagi muvozanat
Tasdiqlangan o‘zgarishlar to‘plami «birdamlik va mas’uliyat o‘rtasidagi muvozanatni» saqlaydi, deb yozdi Yevroparlament raisi Roberta Metsola ijtimoiy tarmoqda. «Biz YeIda migratsiya va boshpana berish muammolarini hal qilish uchun ishonchli qonunchilik bazasini yaratdik. Uni yaratish uchun 10 yildan ko‘proq vaqt ketdi. Lekin biz o‘z so‘zimizda turdik», dedi u.
Islohot nisbatan xavfsiz mamlakatlardan kelgan migrantlar uchun qoidalarni qat’iylashtiradi. U Yevropa Ittifoqiga noqonuniy immigratsiyani cheklashi va noqonuniy immigratsiyaning asosiy qismi to‘g‘ri keladigan Italiya, Gretsiya va boshqa mamlakatlar yukini yengillashtirishi kerak. Yevroparlament tomonidan ma’qullangandan so‘ng, islohot Yevropa Ittifoqi kengashi tomonidan tasdiqlanishi lozim, so‘ngra Yevropa Ittifoqi mamlakatlari ikki yil ichida milliy qonunchilikni unga muvofiqlashtirishga majbur bo‘ladi.
