5 aprel, juma kuni AQShning sharqiy qirg‘og‘ida Nyu-Jyersi shtatida bir kunda ikkita zilzila sodir bo‘ldi. AQSh Milliy geologiya xizmati (USGS) ma’lumotlariga ko‘ra, mahalliy vaqt bilan 10:23 da sodir bo‘lgan birinchi silkinishlar magnitudasi taxminan 4,8 ni tashkil qilgan. Zilzila Filadelfiyadan Bostongacha bo‘lgan bir qancha qirg‘oq shaharlarida, jumladan Nyu-Yorkda ham sezilgan.
Boshqa narsalar qatori, BMT Xavfsizlik kengashining navbatdagi yig‘ilishi ishtirokchilari ham yer silkinishlarini his qilgan, bu tashkilotning Nyu-Yorkdagi shtab-kvartirasidan olingan videotasvirda ko‘ringan. Biroq, binoni evakuatsiya qilishning hojati bo‘lmagan va yig‘ilishning o‘zi bir necha soniyaga to‘xtatilgan.
Birinchi zilziladan so‘ng mintaqada 2 ballgacha bo‘lgan bir qancha yer silkinishlari ham sodir bo‘ldi va mahalliy vaqt bilan soat 17:59 da 4,0 magnitudali yangi silkinishlar qayd etildi. USGS ma’lumotlariga ko‘ra, zilzila o‘chog‘i Nyu-Jyersi shtatidagi Uaytxaus aholi punkti yaqinida bo‘lib, 9,4 km chuqurlikda bo‘lgan.
Nyu-York yaqinida oxirgi 40 yildagi eng kuchli zilzila
Qo‘shma Shtatlarning sharqiy sohillarida zilzilalar nisbatan kam uchraydigan hodisa, deya qayd etadi OAV. O‘tgan yili Nyu-York shtatida 3,8 magnitudali zilzila sodir bo‘lgan edi. Biroq, bu silkinishlar 1983 yilda, shtat shimolidagi Nyukomb shahrida 5,1 magnitudali zilzila kuzatilganidan beri mintaqada qayd etilgan eng kuchlisi bo‘ldi. So‘nggi o‘n yilliklarda AQShning sharqiy qirg‘og‘ida sodir bo‘lgan eng kuchli zilzila 2011 yilda Virjiniyada kuzatilgan silkinishlar bo‘ldi - ularning magnitudasi 5,9 ga yetdi.
Nyu-Jyersi va Nyu-Yorkdagi aeroportlar kun davomida faoliyatini to‘xtatdi. Biroq mahalliy hokimiyatning dastlabki ma’lumotlariga ko‘ra, yer silkinishlari infratuzilmaga jiddiy zarar yetkazmagan. Hodisa oqibatida qurbonlar haqida ham ma’lumot yo‘q.
Nyu-York meri Erik Adams yaqin kunlarda mintaqada 3 magnitudali yana yerosti silkinishlari kuzatilishi mumkinligini ta’kidladi.
Tayvanda so‘nggi 25 yildagi eng kuchli zilzila sodir bo‘ldi
Bundan biroz oldin Tayvanda zilzila yuz berdi, uning magnitudasi kamida 7,2 ni tashkil etdi - bu orolda so‘nggi chorak asrdagi eng kuchlisi bo‘ldi. Mahalliy hukumat ma’lumotlariga ko‘ra, tabiiy ofat kamida to‘qqiz kishining hayotiga zomin bo‘lgan, 1000 ga yaqin aholi jarohatlangan.
Biroq, Tayvan Tinch okeanining olov halqasi ichida joylashgan bo‘lib, bunda Tinch okeani bo‘ylab seysmik yoriqlar chizig‘ida dunyoda bo‘ylab eng ko‘p zilzilalar sodir bo‘ladi.
