5 aprel kuni Qozog‘iston prezidenti Qosim-Jo‘mart To‘qayevning O‘zbekistonga tashrifi yakunlandi.
Xorazm viloyatining Xiva shahrida o‘tgan oliy darajadagi tadbirlar doirasida O‘zbekiston prezidenti Shavkat Mirziyoyev va Qosim-Jo‘mart To‘qayev ikki tomonlama hamkorlikning dolzarb masalalarini muhokama qildilar, mintaqaviy ahamiyatga molik jihatlar yuzasidan fikr almashdilar.
Tashrif chog‘ida «Xiva gilamlari» kombinati faoliyati, yurtimizda ishlab chiqarilayotgan mahsulotlar ko‘rgazmasi bilan tanishdilar.
Xiva shahridagi Ichan-qal’a majmuasining tarixiy obidalari va Nurillaboy saroyi ziyorat qilindi.
Tashrif yakunida Urganch xalqaro aeroportida oliy martabali mehmonni Shavkat Mirziyoyev kuzatib qo‘ydi. So‘ng davlat rahbari Toshkentga jo‘nab ketdi.
