Rossiya Davlat dumasi 19 mart, seshanba kuni Ukrainaga qarshi urushda qatnashish uchun Rossiya Mudofaa vazirligi bilan shartnoma tuzgan shaxslarni jinoiy javobgarlikdan ozod qiluvchi qonun loyihalarini ikkinchi va uchinchi o‘qishda qabul qildi. Hujjatlarda Jinoyat va Jinoyat-protsessual kodekslariga, shuningdek, harbiy xizmat to‘g‘risidagi qonunlarga o‘zgartishlar kiritilmoqda. Yengillik uncha katta bo‘lmagan yoki o‘rtacha og‘irlikdagi jinoyat sodir etgan va tergov yoki sudda bo‘lganlarga, shuningdek, sudlanganlarga nisbatan qo‘llanadi.
Mudofaa vazirligi bilan shartnoma tuzilsa, gumon qilinuvchi shaxslarning jinoyat ishi to‘xtatiladi, real muddatga hukm qilinganlar jazosi esa shartliga almashtiriladi, deyiladi yangi normalarda. Jinoiy javobgarlikdan ozod etilgan shaxslarning xulq-atvorini nazorat qilish harbiy qism qo‘mondonligiga yuklanadi. Yangiliklar shuni ko‘rsatadiki, safarbar etilganlar va shartnoma bo‘yicha harbiy xizmatchilar xizmat uchun davlat mukofotini olgan kundan boshlab yoki xizmatdan bo‘shatilgan kundan boshlab jinoiy javobgarlikdan ozod qilinadi.
Yangiliklar voyaga yetmaganlarning jinsiy daxlsizligiga qarshi, jamoat xavfsizligiga, konstitutsiyaviy tuzum asoslariga va davlat xavfsizligiga qarshi jinoyat sodir etishda gumon qilingan shaxslarga, shuningdek terrorizmda gumon qilinib, ushbu moddalarda nazarda tutilgan jinoyatlarni sodir etganlarga nisbatan tatbiq etilmaydi. Qonun loyihasi Federatsiya kengashi tomonidan ma’qullanib, prezident tomonidan imzolanganidan keyin kuchga kiradi.
Xuddi shunday qonun loyihasi 2023 yil yozida qabul qilingan edi
2023 yil iyun oyida Davlat dumasi Mudofaa vazirligiga tergov ostida bo‘lgan, jazoni o‘tayotgan yoki sudlangan shaxslar bilan shartnoma tuzishga ruxsat beruvchi qonun loyihasini qabul qildi. Biroq o‘sha hujjatda amaldagidan farqli o‘laroq, qonun qabul qilingunga qadar jinoyat sodir etgan shaxslargagina bunday tartibni joriy etishga ruxsat berilgan.
«Vagner» XHKdan sobiq mahbuslarga qarshi jinoiy ishlar
2023 yilda «Vagner» xususiy harbiy kompaniyasi tarkibida Ukrainadagi janglarda qatnashgani uchun afv etilgan sobiq mahbuslarga nisbatan 200 ga yaqin jinoiy ish ochildi, deb yozadi «Verstka» nashri. Ishlarning aksariyati o‘g‘irlik va talonchilik moddalari bo‘yicha qo‘zg‘atilgan.
