Germaniya Ukrainaga 500 million yevro miqdorida yangi harbiy yordam paketini tuzdi. Bu haqda Germaniya mudofaa vaziri Boris Pistorius 19 mart, seshanba kuni Kiyevga harbiy yordam ko‘rsatish bo‘yicha kontakt guruhining «Ramshtayn» formatidagi navbatdagi yig‘ilishi chog‘ida ma’lum qildi.
Xususan, Berlin Ukraina harbiylariga Germaniya qurolli kuchlari (Bundesver) zaxirasidan kechiktirmasdan yetkazib berilishi mumkin bo‘lgan 10 mingta o‘q-dorilarni topshiradi. Bundan tashqari, Germaniya Ukraina armiyasi uchun yana 180 ming snaryad sotib olish uchun pul to‘laydi, shuningdek, 100 mingta 155 mm snaryadlar ishlab chiqarish bo‘yicha shartnoma tuzdi, deya qo‘shimcha qildi Germaniya Mudofaa vazirligi rahbari. Paket doirasida Bundesver Kiyevga 100 ta zirhli piyoda mashinasi, 100 ta logistika mashinasi va ehtiyot qismlarini yetkazib beradi.
Pistorius nemis harbiylarini Ukrainaga yuborish ehtimoli masalasini e’tibordan chetda qoldirmadi. Germaniya Mudofaa vazirligi rahbari ta’kidlaganidek, u avvalroq bunday qadam istisno qilinganini aytgan kansler Olaf Sholsning pozitsiyasiga hech narsa qo‘shimcha qila olmaydi.
Pentagon: Kiyevga yordam berish umumiy xavfsizlikka hissa qo‘shish demakdir
AQSh mudofaa vaziri Lloyd Ostin, o‘z navbatida, Ukrainaning mudofaa xarajatlari «umumiy xavfsizligimizga sarmoyadir» dedi. «O‘zimizni aldamaylik. Rossiya Ukraina bilan cheklanib qolmaydi», - deya qo‘shimcha qildi Pentagon rahbari.
«Rossiya imperatorlik orzulari uchun dahshatli bahoni to‘ladi», dedi Ostin. Ammo, agar «biz Ukrainani qo‘llab-quvvatlasak va uni himoya qilish uchun zarur bo‘lgan qurol-yarog‘ bilan ta’minlasak», Kiyev Rossiyani to‘xtatib qo‘yishga qodir, dedi AQSh Mudofaa vazirligi rahbari. «Erkin dunyo Ukrainaning mag‘lubiyatga uchrashiga yo‘l qo‘ymaydi», - deya xulosa qildi u.
Ukrainaga yordam hajmi
Ukrainaga harbiy yordam ko‘rsatish bo‘yicha kontakt guruhining yig‘ilishlari Germaniyaning Reynland-Pfals federal yeridagi Ramshtayn AQSh harbiy-havo kuchlari bazasida 2022 yilning aprelidan buyon bo‘lib o‘tmoqda. Germaniyaning Kildagi Jahon iqtisodiyoti instituti (IfW) ma’lumotlariga ko‘ra, yanvar oyi o‘rtalariga kelib AQSh Ukrainaga harbiy, gumanitar va boshqa yordam uchun 67,7 milliard yevro, Germaniyaga 22,05 milliard, Britaniya 15,66 milliard yevro ajratgan. Yevropa Ittifoqi mamlakatlarida bu ko‘rsatkich 144,1 milliard yevroni tashkil etadi.
