Dang‘ara tumanida sodir bo‘lgan YTH qurbonlari soni oshdi. Bu haqda Farg‘ona viloyati IIB rasmiy munosabatida ma’lum qilindi. 

 Viloyat IIBga ko‘ra, 2024 yil 20 fevral kuni fuqaro Sh.V. Cobalt mashinasini “Qo‘qon-Mulkobod-Gulbog‘-Pungan” avtomobil yo‘lining Dang‘ara tumanidan o‘tgan qismida boshqarib ketayotib, boshqaruvni yo‘qotib, yo‘lning o‘ng chetida harakatlanib ketayotgan 5 nafar piyodalarni urib yuborgan. Haydovchi hodisa joyidan yashiringan. 

YTH oqibatida O‘.I. va K.I. hodisa joyida vafot etgan. D.I., O‘.Yo. hamda Sh.J. turli darajada tan jarohat olib, shifoxonaga yotqizilgan. Ammo ko‘rsatilgan tibbiy yordamga qaramasdan D.I. va O‘.Yo. ham olgan tan jarohati oqibatida shifoxonada vafot etgan.

Holat yuzasidan viloyat IIB huzuridagi Tergov boshqarmasi tomonidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, haydovchi Sh.V.ga nisbatan qamoqqa olish tarzidagi ehtiyot chorasi qo‘llangan.

Hozirda dastlabki tergov harakatlari olib borilmoqda.