Qozog‘istonga Starlink tizimining dastlabki 500 ta to‘plami yetib kelgan. Bu haqda Zakon.kz nashri xabar bermoqda.

Uskunalarni Raqamli rivojlanish, innovatsiyalar va aerokosmik sanoat vaziri Bagdat Musinning o‘zi qabul qilib olgan.

Vazirning so‘zlariga ko‘ra, Qozog‘iston jami 2 mingta Starlink sun’iy yo‘ldosh tizimi keladi va ular qishloqlardagi 2 000 ta maktabni yuqori tezlikdagi internet bilan ta’minlaydi.

“Uskunalarni qabul qilish jarayonini shaxsan tekshirish uchun Olmaotaga keldim. Kelgusi haftada Turkiston va Oqmo‘la viloyatlaridagi Starlink tizimini o‘rnatishga to‘liq tayyor bo‘lgan maktablarga yetkazib berish boshlanadi”, degan Bagdat Musin.

Vazir Starlink uskunalarining keyingi partiyalari 10 kundan keyin yetib kelishini va barcha hududlarga tarqatilishini ma’lum qilgan.

Ma’lumot uchun, hozircha Qozog‘istonda Starlink sun’iy yo‘ldosh tizimi internet aloqasidan shaxsiy maqsadlarda foydalanib bo‘lmaydi. Bu noqonuniy hisoblanadi.