Dehqonobod tumaniga 4 oy hokimlik qilgan Akrom Sulaymonov lavozimidan ozod qilindi

O‘zbekiston 15:15 / 24.02.2024 20438

Qashqadaryo viloyati Dehqonobod tumani hokimi Akrom Sulaymonov lavozimidan ozod qilingan. Bu haqda uning o‘zi ijtimoiy tarmoqlardagi sahifasida e’lon qilgan.

Azizlar, mehnat faoliyatimda navbatdagi o‘zgarishlar sabab Dehqonobod tumanini tark etdim. Qisqa vaqt bo‘lsa-da, menga ishonch bildirib, o‘z yaqini, aka-ukasidek ko‘rgani uchun barcha faxriylarimizga, hamkasblarimga, ayniqsa, samimiyat va mehmondo‘stlik uchun barcha Dehqonobod tumani ahliga chin yurakdan minnatdorlik bildiraman.

Afsusdaman, barchangizdan uzr so‘rayman, hali qilinadigan ishlar juda ko‘p edi, qayerdadir tugallanmagan ishlarimiz qoldi, o‘ylaymanki, yangi hokimimiz bu ishlarni davom ettiradi.

Menga bergan amaliy yordamingiz, qo‘llab-quvvatlaganingiz, umuman, hamma-hammasi uchun yana bir bor rahmat sizlarga. Yaratgan egam barchangizni o‘z panohida asrasin”, deb yozgan u ijtimoiy tarmoqdagi sahifasida.

Ijtimoiy tarmoqlarda tarqalgan xabarlarga ko‘ra, bugun, 2024 yil 24 fevral kuni bo‘lib o‘tishi rejalashtirilgan Xalq deputatlari Dehqonobod tumani Kengashining navbatdan tashqari sessiyasida tumanga yangi hokim tayinlanishi kutilmoqda.

Ma’lumot uchun, Akrom Sulaymonov 2023 yil 26 oktyabr kuni Dehqonobod tumaniga hokimi etib tayinlangandi.

Ungacha u Shahrisabz shahar hokimi lavozimida faoliyat yuritgan.

Ko‘proq yangiliklar: