O‘zbekistonda naqd puldan foydalanishni qisqartirish va bir qator tovarlar ulgurji savdosini naqdsiz shaklga o‘tkazish rejalashtirilmoqda.Bu haqda Gazeta.uz prezidentga taqdim qilingan taqdimotga tayanib, xabar berdi.
1 apreldan boshlab quyidagi tashkilotlarni elektron to‘lov tizimlariga majburiy tartibda ulash orqali naqdsiz to‘lov-tizimiga o‘tkazish taklif etilmoqda:
- aholiga xizmat ko‘rsatuvchi budjet tashkilotlari;
- neft va gaz mahsulotlari realizatsiya qiluvchi yuridik shaxslar;
- mulkni ijaraga berish bilan shug‘ullanuvchi yuridik shaxslar;
- uy-joylarni jismoniy shaxslarga sotuvchi qurilish tashkilotlari. Xonadonlar uchun to‘lovlarni naqdsiz shaklda elektron hisob-faktura orqali amalga oshirish rejalashtirilmoqda.
Bundan tashqari, O‘zbekistonda chakana va ulgurji savdoning yangi qoidalarini tasdiqlash rejalashtirilmoqda.
1 apreldan boshlab naqd pulga sotib olingan tovarlarni Soliq qo‘mitasining E-Ombor (E-Aktiv) tizimi orqali kirim qilishni joriy etish taklif etilmoqda.
Shuningdek, naqd pulda to‘lovlarni amalga oshirish uchun 100 million so‘m (BHMning 300 baravari) chegaraviy miqdorni belgilash rejalashtirilgan.
Qurilish uchun yog‘och, metall (tunuka, armatura, alyumin profillar), avtomobil shinalari va shakar ulgurji savdosini naqdsiz shaklga o‘tkazish ham ko‘zda tutilmoqda.
Avvalroq, Iqtisodiyot va moliya vaziri Jamshid Qo‘chqorov yashirin iqtisodiyotga qarshi kurashish maqsadida naqd pul muomalasini qisqartirish bo‘yicha prezident qarori loyihasi tayyorlanganini ma’lum qilgandi.
