Angliya: «Tottenhem» qaytmoqda

«Manchester Siti» – «Everton» 2:0
Gollar: 1:0 – 71 Holand, 2:0 – 85 Holand.
«Manchester Siti» – Ederson, Stounz, Ake, Ruben Diash, Akanji (Uoker, 57), Foden, Rodri, Mateush Nunesh (de Bryuyne, 57), Holand, Alvares (Bernardu Silva, 77), Doku (Grilish, 87).
«Everton» – Pikford, Godfri (Koulmen, 56), Tarkovski, Brentueyt, Mikolenko, Yang (Onana, 78), Guyye (Shermiti, 89), Harrison, Garner, Maknil (Dobbin, 88), Kelvert-Lyuin (Betu, 77).
Ogohlantirishlar: Guyye (54), Garner (90).

«Etihad»dagi birinchi bo‘lim ancha zerikarli kechdi. Mavsum boshidan buyon o‘z uyidagi o‘yinlarda doim tanaffusga hisobda oldinda borgan holda yo‘l olgan «Manchester Siti» bu safar raqib darvozasi sohasiga birorta aniq zarba yo‘llay olmadi. Amaldagi chempionlarda qo‘shimcha daqiqalarda vaziyat yuzaga keldi, ammo Akanjining jarima maydoni markazidan yo‘llagan zarbasi himoyachi tomonidan to‘sildi. Ikkinchi bo‘lim ham «shaharliklar» uchun oson kechmadi, De Bryuyne maydonga chiqishigina o‘yinda burilish yasadi.

«Siti» darvoza sohasiga aniq borgan ilk zarbasini golga aylantirdi. Burchak zarbasidan keyin to‘p himoyachilardan Holandga keldi va u to‘pga to‘xtatmasdan shunday kuchli zarba yo‘lladiki, Pikford to‘p yo‘lida turgan bo‘lsa-da, uni o‘tkazib yubordi - to‘p uning qo‘llariga tegib o‘tib darvoza to‘ridan joy oldi. Keyin esa — «Everton» hisobni tenglashtirish umidida oldinga o‘tganida — De Bryuyne bir pas bilan Erlingni oldinga tashladi va u avvaliga o‘zini ta’qib etgan himoyachidan qutildi, keyin darvozabonni dog‘da qoldirdi. Norvegiyalik hujumchi boshlang‘ich tarkibda tushgan 50 o‘yinida 50 gol urdi va bu APLda yangi rekord hisoblanadi.

«Liverpul» – «Byornli» 3:1
Gollar: 1:0 – 31 Diogu Jota, 1:1 – 45 O`Shi, 2:1 – 52 Dias, 3:1 – 79 Nunes.
«Liverpul» – Kelleher, Aleksander-Arnold (Elliott, 46), van Deyk, Kuansa, Roberson (Tsimikas, 90), Endo (Makkonnell, 90), Mak Allister (Klark, 90), Jons, Diogu Jota, Dias (Gakpo, 82), Nunes.
«Byornli» – Trafford, Assinon, O`Shi, Estev (Vitino, 80), Delkrua, Remzi (Massengo, 81), Braunhill, Berge, Amduni (Brun Larsen, 86), Fofana, Odober. 
Ogohlantirishlar: O`Shi (14), Kuansa (19), Braunhill (26), Endo (33), Kompani (55), Nunes (69).

«Manchester Siti» birinchi o‘ringa chiqdi, ammo bu o‘rinni faqat ikki soatdan ortiqroq vaqt davomida saqlab turdi. Lekin «Liverpul»ning o‘yini ham oson kechmadi. Bir tomondan, «Byornli»ni bir necha bor qutqargan Trafford chiqishda qo‘pol xatoga yo‘l qo‘yib, o‘z himoyachisi bilan to‘qnashib ketdi va Dioga Jotaga gol taqdim etdi. Boshqa tomondan — «Byornli» tanaffus arafasida hisobni tenglashtirishi uchun bitta burchak zarbasi yetarli bo‘ldi.

Yurgen Klopp shogirdlari tanaffusdan qaytiboq yana hisobda oldinga chiqib olishdi. Bunda qizillarning omadi ham keldi, Dias rikoshet orqali kelgan to‘pni o‘ta qiyin holatda turib bo‘lsa ham bosh bilan darvoza to‘riga aniq yo‘naltirdi. Keyin yana ikki holatda «Liverpul»ga omad kulib  boqdi, Fofana va Odober bir necha daqiqa vaqt oralig‘ida qulay vaziyatlarni yo‘qqa chiqarishdi. Birinchi zarbani Kelleher qaytardi, yana bir yakkama-yakka vaziyatda mehmonlar vakiliga aniqlik yetishmadi. «Enfild» faqat Elliotning ikkinchi golli uzatmasi va Nunesning boshda bergan ajoyib zarbasidan keyingina yengil tin oldi.

«Tottenhem» – «Brayton» 2:1
Gollar: 0:1 – 17, penalti Gross, 1:1 – 61 Sarr, 2:1 – 90+6 Jonson.
«Tottenhem» – Vikario, Porro, Romero, van de Ven, Udodji (Heyberg, 80), Meddison, Bentankur (Son Hyong Min, 62), Kulusevski (Bissuma, 63), Sarr (Devis, 80), Verner (Jonson, 62), Risharlison.
«Brayton» – Stil, Lempti (Baleba, 90), Dank, van Xekke, Estupinyan, Lallana (Fati, 57), Gross, Gilmor (Beyker-Boaytey, 90), Mitoma, Buonanotte (Veltman, 83), Uelbek (Fergyuson, 83).
Ogohlantirishlar: Meddison (35), Sarr (61), Buonanotte (65), Estupinyan (79), Dank (88).

Ikki hujumkor jamoa qarama-qarshi kurslarda kechgan yorqin o‘yin namoyish etib berishdi, «Brayton» esa o‘yinni xuddi mezbondek boshladi. Birinchi hujumda Vikario Uelbekning aylanma zarbasini bir amallab qaytargandi, ikkinchi vaziyatda ushbu forvard jarima maydoni ichida Romero tomonidan yiqitilganda, Gross penaltidan hisobni ochdi. «Tottenhem» hujumida esa so‘nggi o‘yinlarda golli seriya qayd etgan Risharlisonning omadi kelmadi. Braziliyalik futbolchi nafaqat qator vaziyatlarni yo‘qqa chiqardi, jumladan yakkama-yakka vaziyatdan foydalana olmadi, balki Meddison uchun uzatmani juda yomon amalga oshirdi.

London hujum chizig‘i vakillari uddalay olmagan ishni esa odatda raqib o‘yinini buzish bilan shug‘ullanuvchi Sarr uddaladi. Haddan tashqari kuchli pressing uyushtirgan va hujumkor o‘yin namoyish etgan jamoalar o‘yinida 3:3 yoki 5:5 ko‘rinishidagi durang qayd etilishini ham oddiy qabul qilish mumkin edi. Amalda esa barchasi boshqacha kechdi va o‘yin durang bilan yakunlanishga qarab ketayotganida Angelos Postekogluning almashtirishlari ish berdi. Son Hyong Min Jonsonni ajoyib pas bilan ta’minladi va ligada 90-daqiqadan keyin eng ko‘p gol o‘tkazib yuborgan «shporlar» o‘yin yakunlanishi arafasida g‘alaba golini urishdi.

Ularning o‘yinini hamon oldindan aytib bo‘lmaydi. Shunchalikki, bu jamoa hisobda ortda borgan o‘yinlarida 15 tadan ko‘p ochko jamg‘argan yagona jamoa bo‘lib turibdi. Shu bilan birga londonliklar o‘zi hisobda oldinga borgan o‘yinlarida 15 ochko yo‘qotgan. Shanba kungi o‘yinlarning asosiy yakuni — «Tottenhem» kamida «Aston Villa»ning «MYu»ga qarshi yakshanba kuni kechadigan o‘yini yakunigacha kuchli to‘rtlikka qaytdi.

Ispaniya: Vinisius va Bellinghemning konserti

«Real» – «Jirona» 4:0
Gollar: 1:0 – 6 Vinisius Junior, 2:0 – 35 Bellinghem, 3:0 – 54 Bellinghem, 4:0 – 61 Rodrigo.
Noaniq penalti: Hoselu, 90.
«Real» – Lunin, Karvahal, Tchuameni, Mendi (Fran Garsiya, 77), Kroos (Modrich, 70), Valverde, Kamavinga, Bellinghem (Braim Dias, 57), Vaskes, Vinisius Junior (Gyuler, 77), Rodrigo (Hoselu, 70).
«Jirona» – Gassaniga, Yan Kouto, Huanpe, Erik Garsiya, Migel Guterres, Aleish Garsiya, Martin (Solis, 70), Portu (Torre, 46), Tsigankov (Fernandes, 70), Savio, Dovbik (Stuani, 70).
Ogohlantirishlar: Huanpe (21), Yan Kouto (68), Mendi (76).

O‘tgan turda «Real Sosiyedad» bilan o‘yinda «Jirona»ning uch vakili - himoyachi Blind, yarimhimoyachi Errera va bosh murabbiy Michel Sanches diskvalifikatsiyaga uchragandi. Ammo madridliklarda ham tarkib borasidagi muammolar saqlanib qolmoqda. Ryudiger safga qaytgani va o‘yin qaydnomasi kiritilgani aytilgandi, ammo o‘yin kuni ushbu germaniyalik himoyachi hali yana ikki hafta davolanishi kerakligi ma’lum bo‘ldi.

Ampluasi markaziy himoyachi bo‘lgan biror futbolchisiz qolgan Karlo Anchelotti esa qanot himoyachisi Karvaxal hamda tayanch zonasi vakili Tshuameniga ishonch bildirdi. Shu bilan birga, oldingi chiziqda Vinisius Junior paydo bo‘ldi, u o‘tgan turda «Atletiko»ga qarshi o‘yin arafasida chigalyozdi mashqlar chog‘ida o‘zini noxush sezgan va o‘ynay olmagandi. Maydonni sog‘inib qolgan braziliyalik o‘yin startidayoq ajoyib zarbasi bilan uzoq burchakni aniq nishonga oldi. Keyin esa Vini shvedka uslubidagi pas bilan Bellinghemni qulay vaziyatga chiqardi. Jud bir harakat bilan to‘pni darvozabon yonidan olib o‘tdi va ikkinchi teginishda to‘pni darvozaga joylab, gollari sonini 15 taga yetkazgan holda la liga to‘purarlari poygasida Dovbikdan o‘zib ketdi.

O‘yin davomida angliyalik futbolchi o‘n oltinchi golini ham urdi, shundan keyin «Jirona»da amalda imkoniyat qolmadi. Kataloniyaliklar tanaffusdan qaytib bosim uyushtirishdi va Lunin darvozasi oldida tahlikali vaziyat yuzaga keltirishdi, ammo bunga javoban Vinisius uyushtirgan reydni Bellinghem gol bilan yakunladi. «Santiyago Bernabeu» yana «Ey, Jud» qo‘shig‘ini kuyladi va o‘z jamoasi o‘yinidan bahra olishda davom etdi. Rodrigo esa almashtirilishidan oldinroq o‘yinga nuqta qo‘yuvchi golni urdi.

Birinchi davrada bo‘lgani kabi Anchelotti kataloniyaliklarni taktik jihatdan mag‘lub etdi. Madrid endi turnir jadvalida 5 ochkoga ilgarilab ketdi. «Real» endi faqat o‘zini o‘zi mag‘lub etishi sovrindan quruq qoldirishi mumkin, lekin bu «Jirona»ning bu mavsumdagi ajoyib o‘yini haqidagi taassurotlarni yo‘qqa chiqara olmaydi. Yakshanba kungi o‘yinlardan keyin «Barselona» va «Atletiko» yaqinlashib olishi mumkin, ammo beshinchi o‘rin bilan oradagi farq ancha katta. Jamoa keyingi mavsumda Chempionlar ligasida ishtirok etishiga hech kimda shubha yo‘q.

Italiya: De Rossi «Inter» tomonidan to‘xtatildi

«Roma» – «Inter» - 2:4
Gollar: 0:1 – 17 Acherbi, 1:1 – 28 Manchini, 2:1 – 44 Al-Sha’roviy, 2:2 – 49 Tyuram, 2:3 – 56, avtogol Anhelinio, 2:4 – 90 Bastoni.
«Roma»: Ruy Patrisiu, Karsdorp, Manchini, Heysen, Anhelinio (Spinatssola, 61), Paredes, Kristante (Bove, 61), Pellegrini (Baldansi, 76), Al-Sha’roviy (Zalevski, 76), Dibala (Ozmun, 87), Lukaku.
«Inter»: Zommer, Darmian (Dumfris, 75), Acherbi (de Vrey, 63), Pavar, Bastoni, Dimarko (Karlos Augusto, 75), Mxitaryan, Chalxono‘g‘li, Barella, Tyuram (Sanches, 87), Martines (Arnautovich, 75).
Ogohlantirishlar: Manchini (47), Heysen (90).

Joze Mourinio merosi yoki Daniele De Rossi effekti? Bu borada cheksiz bahslashish mumkin, fakt faktligicha qoladi— bosh murabbiy almashganidan keyin «Roma» barcha uch o‘yinda g‘alaba qozondi. Ha, bular top-darajadagi raqiblar emas («Verona» 2:1, «Salernitana» 2:1, «Kalyari» 4:0) faqat avval «bo‘rilar» shunday raqiblarga qarshi o‘yinlarda ham qoqilardi va bu mavsumda ularda bunday seriya bo‘lmagandi. Tabiiyki, turnir jadvali yetakchisiga qarshi o‘yin oldidan rimliklarda kayfiyat joyida edi. Kuchli startdan keyin «Roma» ikki karra alamli gol o‘tkazib yubordi. Birinchidan, burchak zarbasi ijro etilganida to‘pni uzoqlashtirishga uringan Lukaku uni sobiq jamoadoshi Acherbiga yetkazib berdi va unga 36 yoshga to‘lgan kunida sovg‘a qildi. Ikkinchidan, monitorga taklif etilgan arbitr VAR hakamlari fikriga qo‘shilmadi, ular ofsaydda qolgan Tyuram Ruy Patrisiuga xalaqit bergan deb topishgandi.

Bosh hakam maydon markazini ko‘rsatib golni inobatga olganida, De Rossi jamoaga hali hech narsa yo‘qotilmaganini ko‘rsatib signal berdi. Futbolchilar esa murabbiyga quloq solishdi va tanaffus arafasida mezbonlar hisobda oldinga chiqib olishgandi. Avvaliga Manchini faqat «Inter»dagi markaziy himoyachilar gol urmasligini ko‘rsatdi. Tezkor hujum boshida Lukaku to‘pni o‘zida saqlab qoldi va bu hujum Al-Sha’roviyning muvaffaqiyati bilan yakunlandi. Birinchi bo‘limda o‘tkazib yuborilgan ikki gol — bunaqasi «Inter»da qariyb ikki yildan buyon kuzatilmagandi.

Ammo bu Simone Indzagi jamoasi uchun hukm bo‘la olmasdi. Tanaffusdan keyin mehmonlar tezlikni oshirishdi va Tyuram o‘z faolligini gollarga aylantirdi. Birinchi holatda fransuz Manchinini dog‘da qoldirdi. Ikkinchisida Mxitaryan to‘p uzatgan vaqtda forvard bilan to‘p uchun kurashgan Anhelinio o‘z jamoasi darvozasini ishg‘ol etib qo‘ydi.

Lukakuning javob zarbasini esa Zommer oyoqlari bilan qaytarib oldi. O‘yin oxirida hujum markazida paydo bo‘lgan markaziy himoyachi Bastoni o‘yinga nuqta qo‘yuvchi golni urdi. «Roma» hozirda yaxshi holatda, ammo «Inter» bu chempionatda — amalda boshqa galaktika vakili bo‘lib o‘ynamoqda.

Germaniya: himoyachilar kuni

«Bayyer» – «Bavariya» 3:0
Gollar: 1:0 – 18 Stanishich, 2:0 – 50 Grimaldo, Frimpong 3:0 – 90+5
«Bayyer» – Gradetski, Stanishich, Ta, Tapsoba, Inkapie, Grimaldo (Puerta, 90), Jaka, Andrih, Virts (Glojyek, 90), Tella (Frimpong, 65), Adli (Hofmann, 82).
«Bavariya» – Noyyer, Mazraviy, Dayyer, Upamekano (Kimmih, 60), Kim Min Je, Boe (Gerreyru, 81), Pavlovich (Myuller, 60), Goretska (Tel, 71), Sane, Musiala (Shupo-Moting, 81), Keyn.
Boe (36), Goretska (62), Tapsoba (64), Adli (77), Gradetski (83).

O‘tgan mavsumda inqiroz holatidagi «Bavariya» Dortmundning «Borussiya» klubi oxirgi turlarda sustlashib qolgani tufayli chempionlikni qo‘lga kiritgandi. O‘shanda myunxenliklarning chempionlik xarakterini ham, jamoalar gegemon tempiga bardosh bera olmaydigan bundesliga muammolarini ham muhokama qilishgandi. Gegemonga raqobat qiluvchi jamoalar o‘zaro o‘yinlarda batamom yakson etilishi so‘nggi yillarda ko‘p kuzatilgandi.

Ammo Habi Alonso boshqaruvidagi «Bayyer» — alohida tarix. 21 tur davomida birorta mag‘lubiyatga uchramagan jamoa birinchi davrada Myunxenga tashrifida o‘z da’volarini namoyish etib bergandi (2:2). Uyda esa leverkuzenliklar o‘yinni shunchalik kuchli boshlashdiki, bu bilan go‘yoki Opta kompaniyasi tahlilchilariga javob qaytarmoqchidek edi. Uning superkompyuteri shanba kungi o‘yin oldidan mavsumning qolgan qismidagi voqealar rivojini prognoz qilgan va «aspirinchilar»ning Kumush tovoqni qo‘lga kiritish imkoniyatlarini 49 foizga baholagandi.

Ammo birinchi bo‘lim yakunlariga ko‘ra statistika gurulari vizual taassurotlarni faqatgina mustahkamlab qo‘yuvchi vaziyatlarni qayd etishdi. Xususan, Keynning maydondaligi umuman sezilmadi. 45 daqiqa davomida u atigi yetti bor to‘pga tegindi va bu ishni biror marta raqib jarima maydonida amalga oshirmadi. «Bavariya» futbolchilari tanaffusga qadar jami uch bor zarba berishdi. Oxirgisi — «Bayyer»ning faollashuvidan keyingi qarshi hujumda ro‘y berdi. Bu vaqtda mezbonlar safida myunxenliklardan ijaraga olingan va ketishi Tomas Tuxelni ranjitgan Stanishich hisobni ochib bo‘lgandi.

U Leverkuzenda rotatsiya futbolchisi, qanotlarda asosiy ishni boshqa laterallar bajarishadi. Ikkinchi bo‘limda hisobdagi farqni ikkitaga oshirgan Aleks Grimaldo 8 gol va 9 golli uzatma bilan — umuman kosmik darajada o‘yin ko‘rsatmoqda. Yana bir qanot himoyachisi — Frimpong ham shunga yaqin natija qayd etmoqda (6+6), u o‘yin oxirida Noyyer hujumga qo‘shilganida «Bavariya»ning bo‘sh qolgan darvozasini ishg‘ol etdi. Shunday qilib, «Bayyer»ning hujum vakillari turli sabablar bilan yordam bera olmayotgan mahalda (Bonifase, Patrik Shik, Palasios) himoya vakillari amaldagi chempion darvozasiga uchta gol yo‘llashdi.

Leverkuzen sovringa intilmoqda, Myunxendagilar esa Yulian Nagelsmann ahmoqona tarzda ishdan bo‘shatilgani uchun tirnog‘ini tishlashmoqda. Endi barcha «Bavariya»ning sobiq futbolchisi va jamoaning gegemonligiga chek qo‘yishga bel bog‘lagan Habi Alonsoni olqishlamoqda. Darvoqe, endi Opta superkompyuteri «Bayyer»ning chempionlik uchun imkoniyatlarini 66 foizga baholamoqda.

Kun statistikasi

• «Fulhem» yarimhimoyachisi Joau Palinya kuchli beshlikda bu mavsumda 100 dan oshiq podkat amalga oshirgan birinchi futbolchi bo‘ldi.
• «Manchester Siti» yarimhimoyachisi De Bryuyne o‘tgan mavsum boshidan buyon barcha turnirlarda forvard Holandga 12 bor assistentlik qilgan. Bu Angliya futbolidagi eng samarali bog‘lam bo‘lib turibdi.
• Bellinghemning madridliklar safida bir mavsumdagi 16 goli — XXI asrda Ispaniya chempionatidagi yarimhimoyachilar uchun rekord ko‘rsatkich.
• «Bayyer» mavsum boshidan buyon 31 o‘yinda yutqazmayapti. Yana bir mag‘lubiyatsiz o‘yindan keyin leverkuzenliklar Germaniyada «Bavariya»ga tegishli bo‘lgan rekordni takrorlaydi.
• «Inter» safidagi eng katta yoshli futbolchi Acherbi 36 yoshga to‘lgan kunida gol urdi.