Termiz shahrida yashovchi 23 yoshli M.M. IIBga murojaat qilib, noma’lum shaxs firibgarlik qilib bank kartasidan 27 mln so‘m pullarni yechib olganini ma’lum qilgan. Bu haqda IIV Kiberxavfsizlik markazi xabar bermoqda.

Tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Surxondaryo viloyati, Jarqo‘rg‘on tumanida yashovchi 28 yoshli K.B. sodir etganligi aniqlangan.

Unga ko‘ra, K.B. Telegram orqali yolg‘on e’lonlar ostida soxta havola jo‘natib kelgan. So‘ng soxta havolaga bank kartasi ma’lumotlarini kiritgan fuqarolarning hisobidagi pullarni bank kartasiga o‘tkazib olib, o‘z ehtiyojlari uchun sarflab yuborgan.

Qayd etilishicha, mazkur holat yuzasidan Jinoyat kodeksining 168-moddasi 3-qismi “b”, “g” bandi bilan jinoyat ishi qo‘zg‘atilgan.

Hozirda K.B.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.

Ma’lumot uchun, Jinoyat kodeksining 168-moddasi 3-qismi “b”, “g” bandidagi jinoiy xatti-harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.