Surxondaryo viloyati Sherobod tumanida yashovchi E.Sh. IIBga murojaat qilib, bank kartasidan 17 mln 50 ming so‘m noma’lum shaxs tomonidan firibgarlik yo‘li bilan o‘zlashtirilganini ma’lum qilgan. Bu haqda IIV Kiberxavfsizlik markazi xabar bermoqda.

Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Termiz shahrida yashovchi 35 yoshli A.J. sodir etganligi aniqlangan.

Gumonlanuvchi sifatida tergov harakatlariga jalb etilgan, A.J. internetda “Iphone 13pro” hamda "Xiomi 12" rusumli telefonlar arzon narxda sotiladi deya yolg‘on e’lon joylashtirgan.

So‘ng bu e’longa ishongan E.Sh. bilan telefon orqali gaplashib, oldindan 17 mln 50 ming so‘mni o‘zining bank kartasiga o‘tkazib olgan. Yozishmalarni o‘chirib, jabrlanuvchining qo‘ng‘iroqlariga javob bermay, uni qora ro‘yxatga kirgazib qo‘ygan.

Mazkur holat yuzasidan Jinoyat kodeksining 168-moddasi 1-qismi bilan jinoyat ishi qo‘zg‘atilib, A.J.ning sodir etilib, fosh etilmay qolgan boshqa shu turdagi jinoyatlarga aloqadorligini tekshirish maqsadida tergov, tezkor-qidiruv harakatlari davom ettirilmoqda.