Qashqadaryoda yo‘ldan o‘tib ketayotgan YPX xodimlarini haqorat qilganlar 10 sutkaga qamaldi

Koson tumanida 4 nafar erkak mashinada yo‘ldan o‘tib ketayotgan YPX xodimlarini haqoratlab videoga olgan va uni Telegram`da tarqatgan. Ularning har biriga 10 sutkadan ma’muriy qamoq jazosi tayinlandi.

Foto: Videodan kadr

Qashqadaryo viloyati Koson tumanida yo‘ldan o‘tib ketayotgan yo‘l-patrul xizmati xodimlarini haqoratlagan erkaklarga sud hukmi o‘qildi. Bu haqda Milliy TV telekanali dasturida xabar berildi.

4 nafar erkak yo‘ldan o‘tib ketayotgan YPX xodimlarining avtomashinasini videoga olib, xodimlarni turli so‘zlar bilan haqorat qilgan. Videoni Telegram orqali turli guruhlarga jo‘natgan.

«7 yanvar kuni o‘rtoqlarimiz bilan yig‘ildik. Spirtli ichimlik ichib olgandik, keyin tashqariga chiqdik. O‘sha vaqtda mahallamizning Telegram guruhiga yo‘ldan o‘tayotgan GAI mashinasiga qarab haqoratli so‘zlar ishlatdik», — deydi erkaklardan biri.

Jinoyat ishlari bo‘yicha Koson tumani sudi hukmi bilan ularning har biriga Ma’muriy javobgarlik to‘g‘risidagi kodeksning 183-moddasi (Mayda bezorilik) va 194-moddasi (Ichki ishlar organlari xodimining qonuniy talablarini bajarmaslik) 1-qismi bilan 10 sutkadan ma’muriy qamoq jazosi tayinlandi.

#Qashqadaryo #YPX