Россиянинг 2024 йилга ва 2025-2026 йиллардаги режалаштириш даврига мўлжалланган федерал бюджети лойиҳаси 17 ноябр, жума куни Россия Давлат думаси томонидан учинчи ўқишда қабул қилинди. 

Ушбу ҳужжатга кўра, Россия давлат бюджети даромадлари 2024 йилда 35 триллион рублни, 2025 йилда - 33,5 триллион рублни, 2026 йилда - 34,1 триллион рублни ташкил қилади. Шу билан бирга, 2024 йилда федерал бюджетни «мувозанатлаш» учун Миллий фаровонлик жамғармасининг 1,3 триллион рубл миқдоридаги маблағлари ишлатилади, дейилади Давлат думаси сайтида. 

Айни пайтда, Давлат думаси спикери Вячеслав Володинга кўра, 2024 йилда бюджет даромадлари 29 фоизга ошади. «Шу билан бирга, даромаднинг учдан икки қисми (67,2 фоиз) нефт ва газга боғлиқ эмас», — дейилади пресс-релизда. 

Россиянинг мудофаага рекорд даражадаги харажатлари

Қонун лойиҳасининг тушунтириш хатида айтилишича, қабул қилинган федерал бюджетда Россия замонавий тарихидаги рекорд даражадаги ҳарбий харажатлар кўзда тутилган: «миллий мудофаа» бандига тахминан 10,8 триллион рубл ажратилиши режалаштирилган. Бу 2024 йилда кутилаётган харажатларнинг 29,4 фоизини ташкил этади. 

Таққослаш учун: «Ижтимоий сиёсат» бандига 7,7 триллион рубл (харажатларнинг 21,1 фоизи) ажратилади. 

Шунингдек, «Махсус ҳарбий операция (Россиянинг Украинага қарши уруши) иштирокчилари ва уларнинг оила аъзолари, туғуруқ таътилидаги ёки етти ёшгача бўлган болалари бор аёллар, пенсионерлар ва ёш мутахассислар учун касбий тайёргарлик дастурлари»ни молиялаштириш ҳам кўпайтирилади. Ушбу мақсадлар учун жами 18,6 миллиард рубл ажратилади. 

Бундан ташқари, Россия ҳарбий хизматчилар ва ҳуқуқни муҳофаза қилиш органлари ходимларининг иш ҳақини, шунингдек, «ҳарбий ва унга тенглаштирилган хизматдан бўшатилган» шахсларнинг пенсияларини 4,5 фоизга индексация қилмоқчи.