Qozog‘iston moliyachilarining XII Kongressi doirasida raqamli tengeni ishga tushirish marosimi bo‘lib o‘tdi. Bu haqda Qozog‘iston Milliy banki xabar berdi. 

Regulyator sinov tariqasida raqamli tenge platformasini sinovdan o‘tkazadi. Mijozlar mobil ilovada hisobraqam ochish orqali valutadan foydalanishi mumkin bo‘ladi. 

Milliy bank ishtirokchi banklar foydasiga raqamli tengening birinchi emissiyasini amalga oshirdi. Raqamli tengedan foydalangan holda birinchi real chakana savdo ham amalga oshirildi. 

Qozog‘iston Milliy to‘lov korporatsiyasi raisi Binur Jalenov so‘zlariga ko‘ra, mamlakatda mavjud to‘lov kartalarini raqamli tenge platformasi bilan birlashtiruvchi texnologiya yaratildi. 

«Bu sizga ApplePay, SamsungPay va boshqa qurilmalardan foydalangan holda dunyoning istalgan nuqtasida, qayerda bo‘lsangiz ham raqamli tengeda to‘lov qilish beradi», deb tushuntirdi u. 

Raqamli tengeni to‘liq miqyosda joriy etish 2025 yil oxirigacha rejalashtirilgan. 

Raqamli tenge alohida elektron hamyonlarda qayd etiladigan noyob raqamli ketma-ketliklar formatida chiqariladi. Raqamli pullarni joriy etishning afzalliklari qatorida ekspertlar korrupsiyaga qarshi kurashning yana bir usuli paydo bo‘lganini, oflayn formatda naqd pulsiz to‘lovlarni amalga oshirish imkoniyatini, shuningdek, vositachilar sonini kamaytirish hisobiga transchegaraviy to‘lovlarni tezlashtirish va narxini pasaytirishni keltirmoqda. 

Xuddi shunday valuta Rossiyada ham joriy qilinmoqda. 15 avgustda raqamli rubl orqali to‘lovlarni amalga oshirish sinov tariqasida ishga tushirilgan.