Туркия президенти Ражаб Тоййиб Эрдўған Арманистон ва Озарбойжон ўртасидаги можаро тезда тинч йўл билан ечим топишига умид билдирди. Шу билан бирга, Тоғли Қорабоғни Озарбойжон ҳудуди деб билишини эслатиб ўтди. 

Эрдўғаннинг таъкидлашича, Тоғли Қорабоғни Озарбойжон ҳудуди деб тан олмайдиган вариантлар можарога ечим бўла олмайди. 

«Қорабоғ — Озарбойжон ҳудуди. Унга бошқа мақом ўрнатишга уринишлар ҳеч қачон муваффақиятли бўлмайди», деди у. 

Туркия раҳбари Қорабоғнинг келажаги ҳақидаги тасаввурлари ҳақида гапирар экан, бу ҳудуд «ҳамма, жумладан арманлар ҳам бирга яшаши мумкин бўлган Озарбойжон ҳудудида» бўлиши кераклигини таклиф қилди. 

Туркия президенти Ереван ва Боку ўртасидаги музокара жараёнини доимо қўллаб-қувватлаганини эслатди. «Афсуски, Арманистон бу тарихий имкониятдан фойдаланишга шошилмаяпти», деди Эрдўған. 

Озарбойжон Мудофаа вазирлиги сешанба куни «Озарбойжон конституциявий тузумини тиклаш ва арман ҳарбийларининг провокацияларини бостириш мақсадида Қорабоғда маҳаллий аҳамиятга эга аксилтеррор тадбирлари ўтказилаётганини» эълон қилган эди. Шундан сўнг, Арманистон Тоғли Қорабоғ ҳудуди Озарбойжон томонидан ўққа тутилаётгани ҳақида хабар берди.