Fransiyadagi hukumat nazorat organi Apple kompaniyasidan iPhone 12 smartfonlarini aholidan qaytarib olishni talab qildi. Bunga elektromagnit nurlanish darajasi haddan tashqari yuqori bo‘lgani sabab qilib ko‘rsatilgan. Hozirgi vaqtda ushbu smartfonlarning Fransiyadagi savdosi vaqtincha to‘xtatilgan. 

Milliy radiochastota agentligi (ANFR) Apple kompaniyasini allaqachon ishlatilayotgan telefonlar uchun ushbu muammoni tezda hal qilish maqsadida barcha choralarni ko‘rishga chaqirmoqda. 

Fransiya regulyatori ta’kidlaganidek, smartfonlardagi yangilanishlar agentlik tomonidan nazorat qilinadi. Agar ular samara bermasa, Apple allaqachon sotilgan telefonlarni qaytarib olishga majbur bo‘ladi. 

Yevropa Ittifoqi standartlariga ko‘ra, telefonning elektromagnit energiyani bir kilogrammga singdirish darajasi (SAR) 4 vattdan oshmasligi lozim. Fransiyada iPhone 12 smartfonlaridagi ko‘rsatkich 5,74 vattni tashkil qilgan. 

Apple kompaniyasi bunday xulosalarni rad qilmoqda va qurilma barcha radiatsiya qoidalariga mos kelishini, smartfon ko‘plab xalqaro tashkilotlar tomonidan sertifikatlangan va butun dunyo bo‘ylab amaldagi barcha radiatsiya qoidalari va standartlariga javob berishini ta’kidlamoqda.