O‘zbekiston Investitsiyalar, sanoat va savdo vaziri o‘rinbosari Oybek Hamroyev Saudiya Arabistonining Vision Industries kompaniyasi biznesni rivojlantirish bo‘yicha direktori Muhammad Bou-Zeid bilan uchrashdi.
Vazirlik ma’lumotiga ko‘ra, uchrashuv chog‘ida shamol energetikasi tizimlari uchun komponentlar ishlab chiqarilishini mahalliylashtirish sohasida qo‘shma loyihalarni amalga oshirish bo‘yicha kelishuvlarga erishildi.
Vision Industries kompaniyasi 2021 yilda tashkil etilgan. Hozirgi kunda u dunyoning 13 davlatida joylashgan umumiy quvvati 45 GVtga teng muqobil energiya manbalarini boshqarib keladi.
Umumiy qiymati 5,3 milliard dollarlik loyihalar qatoriga elektr energiyasini saqlash tizimlarini qurish, yashil vodorod ishlab chiqarish va shamol energetikasi tizimlarida ishlatiladigan komponentlarni ishlab chiqarish kiradi.
