Indoneziya Ukrainadagi urushni tinch yo‘l bilan hal qilish bo‘yicha o‘z rejasini taklif etdi

Jahon 16:22 / 03.06.2023 8722

Indoneziya mudofaa vaziri Prabovo Subianto Singapurda bo‘lib o‘tayotgan «Shangri-La muloqoti» xavfsizlik konferensiyasida Ukrainadagi urushni tinch yo‘l bilan hal qilish bo‘yicha o‘z rejasini taklif qildi, deb yozadi TASS.

Boshqa narsalar qatorida, Subiantoning rejasi quyidagilarni nazarda tutadi: 

  • har ikki tomondan zudlik bilan o‘t ochishni to‘xtatish; 
  • demilitarizatsiya zonasini yaratish - har bir tomon hozirgi pozitsiyalaridan 15 kilometr uzoqlikda chekinishi kerak; 
  • ushbu zonada xalqaro tinchlikparvar kuchlarni joylashtirish; 
  • BMT vositachiligida «bahsli hududlar»da referendumlar o‘tkazish (Subianto bu qaysi hududlar ekanligiga aniqlik kiritmadi). 

Vazirning so‘zlariga ko‘ra, taklif etilayotgan chora-tadbirlar «tarixda o‘z samarasini ko‘rsatgan», jumladan, Koreya yarimorolida ham. «Ha, Koreyadagi mojaro hali ham doimiy yechimga muhtoj. Biroq, 50 yil davomida bizda hech bo‘lmaganda biroz tinchlik bor, bu ommaviy vayronagarchilik va begunoh odamlarni o‘ldirishdan ko‘ra yaxshiroqdir», deya qo‘shimcha qildi u. 

May oyida Politico Qo‘shma Shtatlar Rossiya-Ukraina urushini Koreya yarimorolidagi mojaro kabi yillar yoki ehtimol o‘nlab yillar davomida saqlanib qoladigan muzlatilgan mojaroga aylantirish imkoniyatini istisno etmayotgani to‘g‘risida yozgan edi. O‘z navbatida, Moskva va Kiyev mojaroni muzlatishga qarshi chiqdi. 

O‘sha oyda Ukraina prezidenti Volodimir Zelenskiy Kiyev tinchlik muzokaralariga qarshi emasligini, biroq hech qanday hududiy yon bosishga tayyor emasligini aytdi. 

Ko‘proq yangiliklar: