Bank operatsiyalarini va ijtimoiy xizmatlarni masofadan ko‘rsatish, bir so‘z bilan aytganda bank xizmatlarini raqamlashtirish maqsadida “xazna” mobil ilovasi va uning veb dasturi ishga tushirildi.
“Ko‘pchilik jamg‘arilib boriladigan pensiya tizimi bo‘yicha yig‘ilgan mablag‘lar haqida ma’lumot olish uchun bankka murojaat qilishadi. Bunga ortiqcha vaqt sarflamasdan “xazna” ilovasidan ko‘rsa bo‘ladi. Faqat bu emas yana ko‘plab ma’lumotlarni onlayn tarzda olish mumkin. Bu ilovani yanada takomillashtirish ustida ishlayapmiz.
Ilovani ommalashtirish maqsadida turli aksiyalar o‘tkazyapmiz. Masalan, bir oyda 5 mln so‘mgacha bo‘lgan pul o‘tkazmalari har qanday kartadan foizsiz amalga oshiriladi.
Onlayn xizmatlarni ko‘paytirish bilan ikki barobar ko‘p aholiga xizmat ko‘rsatilyapti. Shu o‘rinda eslatib o‘tish kerak, xalqimiz ham bu xizmatlardan foydalanishni yaxshi o‘zlashtirishsa ham o‘zlariga, ham bankimizga qulay bo‘lar edi”, - dedi Xalq banki boshqaruv raisining birinchi o‘rinbosari Zafar Azimov.
Xalq banki ma’lum qilishicha, ushbu ilova foydalanuvchilari bugun 88 mingdan oshgan. Ilova orqali 457,5 mingta tranzaksiyalar amalga oshirilgan. Mazkur ilova orqali 40 dan ortiq davlat xizmatlaridan foydalanish mumkin. Bank aholi uchun masofadan turib amalga oshiriladigan xizmatlar sonini va sifatini kengaytirishni asosiy vazifa deb biladi.
Bugun Xalq banki filiallariga bormasdan turib ham barcha kommunal to‘lovlarni to‘lash, xalqaro pul o‘tkazmalarini yuborish mumkin. Bankning rivojlantirish strategiyasi Osiyo Taraqqiyot banki bilan hamkorlikda ishlab chiqilgan va tasdiqlangan. Strategiya doirasida 2025 yilga qadar ko‘plab loyihalarni amalga oshirish ko‘zda tutilgan.
Aholiga qulaylik yaratish uchun xorijdan 1800 ta bankomatlar olib kelinib, turli hududlarda o‘rnatilgan. Ayni paytda respublika bo‘ylab bankning bankomatlari soni 3111 taga yetgan. Joriy yilning may oyida O‘zbekistonda birinchilardan bo‘lib Xalq banki tomonidan Humo va Uzcard bankomatlarini integratsiyalash yo‘lga qo‘yildi. Endi moliya muassasasiga qarashli bankomatlar qaysi to‘lov tizimiga tegishli bo‘lishidan qat’i nazar Humo va Uzcard kartalaridan naqd pul yechish mumkin. O‘z-o‘ziga xizmat ko‘rsatuvchi Avtomatlashtirilgan depozit mashinalar (ADM) soni 52 taga yetdi.
Ta’kidlanishicha, Xalq banki xizmat ko‘rsatish jarayonlarini muvofiqlashtirish hamda kassadagi naqd pul mablag‘larini samarali va markazlashgan holda boshqarishni yo‘lga qo‘ymoqda. Shu maqsadda Toshkent shahrida Yagona kassa markazi tashkil etildi.
Amalga oshiriladigan yirik loyihalardan biri filiallarni optimallashtirishdir. Bank va kassa xizmatlarini markazlashtirish hisobiga tez va sifatli xizmat ko‘rsatish maqsadida bosqichma-bosqich “Yagona MFO” tizimiga o‘tish ishlari boshlangan.
Reklama
