Латвия адлия вазири Инесе Либиня-Эгнере ўз мамлакатининг Европа кенгашига раислигидан Украинадан депортация қилинган болалар хавфсизлигини таъминлаш масаласини ҳал қилиш учун фойдаланмоқчи. У 2023 йил 23 май, сешанба куни DW нашрига берган интервюсида украиналик болаларнинг қайтишини, май ойи ўрталарида Ригага ўтган Европа кенгаши раислигининг устувор йўналишларидан бири деб атади.

"Мен аниқ вақтни айта олмайман, лекин жуда кеч эканлигини биламан. Буни анча олдин қилиш керак эди, бизда режа бўлиши ва бунинг устида жиддий ишлашимиз керак эди", - деди Латвия вазири.

Бундан ташқари, Инесе Либиня-Эгнере Европа кенгашининг 46 мамлакати “умумий ечимга келиш учун бирлашиши”ни рамзий намойиш қилишига аҳамият қаратди. "Биз яна бир бор инсон қадр-қимматини биринчи ўринга қўйганимизни ва ҳар бир инсонни қандай ҳимоя қилишимиз мумкинлигини кўрсатишимиз керак", деди у.

Украина 2022 йил февралида кенг кўламли босқин бошланганидан бери Россияни 20 мингга яқин болани ўғирлаганликда бир неча бор айблаган. Айнан шу иддаолар муносабати билан Халқаро жиноий суд март ойида Россия президенти Владимир Путин ва Россиянинг болалар ҳуқуқлари бўйича омбудсманı Мария Лвова-Беловани ҳибсга олишга ордер берган эди.