«Барселона» клуби расмий сайти Жоржи Альба жамоадаги 11 йиллик фаолиятидан кейин мавсум якунида Каталония клубини тарк этишини маълум қилди. Альба ва «Барса» ўртасидаги амалдаги келишув 2024 йилга қадар имзоланган бўлса-да, шартномани ўзаро бекор қилиш бўйича бир тўхтамга келинган.
💙❤️ GRÀCIES 💙❤️ GRACIAS 💙❤️ THANK YOU 💙❤️ pic.twitter.com/2pARAdY02j
— Jordi Alba (@JordiAlba) May 24, 2023
Испаниялик 34 ёшли ҳимоячи Каталония клубида 11 йил фаолият олиб борди. У келаси мавсум янги жамоаси сафига эркин агент сифатида ўтади.
Қайд этилишича, Альба ва Серхио Бускетс якшанба кунги «Мальорка»га қарши ўйинда «Камп Ноу»да мухлислар билан хайрлашади.
Маълумот учун, Альба 2012 йилдан буён Каталония клубида тўп суриб, 5 карра Ла Лига чемпиони, 5 марта Испания кубоги соҳиби, 4 карра Испания Суперкубоги ғолиби бўлган. Шунингдек, у «Барса» билан Чемпионлар лигаси, Европа Суперкубоги ва клублар ўртасидаги ЖЧ бош совринларини қўлга киритган.
Аввалроқ, Бускетс ва Альба Месси билан бирга ёзда Саудия Арабистонининг «Ал-Ҳилол» клубига ўтиши мумкинлиги ҳақида хабарлар тарқалганди.
